Dy nga të dyshuarit si autorë të masakrës së Cërrikut të vitit 1997 arrestohen sërish. Policia e Elbasanit ka arrestuar 58-vjeçarin Meti Bozi dhe 61-vjeçarin Skënder Cano, pasi ishin shpallur në kërkim 2 ditë më parë kur është dhënë edhe vendimi i Gjykatës së Krimeve të Rënda.
Bozi dhe Cano janë shpallur fajtorë në rigjykimin nga Gjykata për Krimet e Rënda në Tiranë për vrasjen e gjashtë gardistëve dhe plagosjen e 16 të tjerëve në ngjarjet e ndodhura në Cërrik në vitin 1997.
Sipas Policisë, ndalimi i Bozit u bë pasi Gjykata e Shkallës së Parë për Krimet e Rënda Tiranë, me vendim penal më datë 22.12.2016, e ka dënuar me burgim të përjetshëm për veprat penale të “Vrasjes në rrethana të tjera cilësuese e kryer në bashkëpunim, 6 herë, vrasjes në rrethana të tjera cilësuese e kryer në bashkëpunim,16 herë.
Ndërsa për Canon Gjykata e Krimeve të Rënda në Tiranë vendosi dy ditë më parë dënimin me 13 vjet burg.
Këta shtetas, si anëtarë të bandës së Cërrikut, u dënuan për vrasjen për shkak të cilësive të veçanta të gjashtë policëve dhe vrasjen e mbetur në tentativë për 16 efektivë të tjerë të policisë dhe Gardës së Republikës.
Meti Bozi, Skënder Cano dhe Llazar Bicja u shpallën të pafajshëm nga Apeli i Krimeve të Rënda në shtator të 2012-s, vendim ky që u rrëzua nga Gjykata e Lartë në 2015 dhe çështja u kthye për rigjykim në Shkallën e Parë të Krimeve të Rënda.
Në maj të vitit 1997 u sulmua me armë posta e policisë në qytetin e Cërrikut. Pas sulmit, forcat e Gardës nisën nga Tirana për të rivendosur rendin në këtë qytezë. Por, sipas prokurorisë, garda u sulmua nga grupe të armatosur, të organizuar nga te pandehurit, ku dhe mbetën të vrarë gardistët Besnik Sula, Bashkim Mnella, Sali Martini, Qemal Mehmeti dhe Petrit Ndoi, si dhe u plagosën 16 të tjerë.
