Nga Enkel Xhangoli
Ende nuk ka një aftat se kur mund të hapen negociatat për anëtarësimin e Shqipërisë në BE dhe pse u fol nga qeveria se data e tyre është e vendosur në ditën që do të votohet “Vetting-u”. Drejtori i Studimeve Politike, Afrim Krasniqi shprehet për Boldnews.al se deklaratat e bëra nga kryeministri Edi Rama në adresim të BE-se janë cinike dhe të pa menduara sepse ende nuk kemi rezultate konkrete përsa i përket ndalimit të korrupsionit dhe zhdukjen e faktorëve korruptiv në vend.
“Qeveria gaboi kur premtoi hapjen e negociatave madje injoroi dhe pati sjellje aspak korrekte me shtetin kryesor partner në Evropë. Është amatore, cinike dhe e gabuar të deklarosh në mediat perëndimore se zgjidhja e krizës në BE vjen nga Shqipëria, apo tu thuash diplomatëve perëndimorë se vitin tjetër BE do jetë e detyruar të marrë vendim pozitiv për Shqipërinë! Vetëm mentalitete jashtë realitetit mund të krijojnë skena e ide të tilla. Për Perëndimin nuk mjaftojnë ligjet që ne bëjmë, as deklaratat politike dhe as dëshirat personale, ata kërkojnë rezultate konkrete, trend stabiliteti dhe standarde më të larta sesa ecuria e deritanishme e tranzicionit. Këto janë edhe ato çfarë qytetarët shqiptarë duan, presion dhe marrin si premtime në fushata elektorale.” – shprehet Krasniqi.
Ngërçi i hapjes së negociatave erdhi dhe si rezultat i mosrespektimit të reformës në drejtësi, e cila mendohej se do të dërgonte prapa hekurave “peshqit” e mëdhenj të korrupsionit në Shqipëri. Për Krasniqin kjo qeveri nuk e i ka mbajtur premtimet me të cilat erdhi në pushtet, ndërsa opozita duhej të ushtroj më shumë presion ndaj saj. Gjithashtu ai thekson se dhe reforma zgjedhore është një pikë e rëndësishmë për vendin tonë ndërsa shton se nëse Shqipëria do të mund të respektoj të gjitha pikat e caktuara hapja me e afërt e negociatave do të jetë viti 2018-të.
“Ndaj kemi një paradoks, qytetarët tanë dhe BE janë në një mendje, politika vendimmarrëse është në anën tjetër. Përgjegjësia kryesore bie mbi qeverinë, e cila megjithëse ka një bilanc modest suksesi, nuk arriti të bëjë ndryshimin e madh për të cilin u votua dhe për të cilin kishte pritshmëri brenda e jashtë Shqipërisë. Nga ana tjetër, në reformën në drejtësi apo reformën zgjedhore, etj, edhe opozita do të duhej të kishte një qëndrim më konstruktiv dhe më investues për besim me partnerët ndërkombëtarë. Nëse reforma në drejtësi jetësohet, nëse ligjet mbështetëse miratohen dhe strukturat ngrihen, nëse zgjedhjet ofrojnë një standard më të lartë dhe nëse dekriminalizimi e lufta ndaj korrupsionit dërgon në burg vendimmarrësit e korruptuar dhe jo qytetarët e thjeshtë, atëherë shansi më i afërt për Shqipërinë mbetet fillimi i vitit 2018.”- shton më tej Drejtori i Studimeve Politike, Afrim Krasniqi për Boldnews.al
Sipas tij, pa u respektuar reformat dhe pikat e caktuar nga BE-ja, çdo gjë që flitet nga qeveria është një alibi e cila e ka gënjyer popullin duke e keq informuar.
“Deri atëherë të gjitha premtimet dhe deklaratat që dëgjohen në Tiranë janë shqip, vetëm për konsum të brendshëm, janë alibi dhe thjesht për qëllime elektorale. Qytetarët meritojnë të dinë të vërtetën dhe në Shqipëri, ata vijojnë të jenë të fundit që i mësojnë të vërtetat!” – përfundon Krasniqi.
Hapja e negociatave po shtyhen përtej parashikimeve, ku Shqipëria rezulton të vetëizolohet nga kjo klasë politike e cila pengon çdo ditë integrimin e vendit.
