Nga Boldnews.al
Gjashtë muaj përpara zgjedhjeve të 2017, kur Komisionit për Reformën Zgjedhore i ka mbaruar mandati, Petrit Vasili nuk e di ende se çfarë do të ndryshojë. Të gjitha forcat politike shpresojnë tek “zemërgjerësia” e Taulant Ballës, i cili tha se do të zgjasë edhe me 60 ditë mandatin e Reformës Zgjedhore.
Por në një intervistë për Boldnews.al, duke folur si anëtar i këtij komisioni, Vasili i cili vjen nga radhët e LSI është shfaqur i tërhequr dhe pa asnjë ndikim në këtë proces të rëndësishëm për vendin tonë.
“Komisioni i posaçëm për reformën zgjedhore u përqendrua në fillimin e veprimtarisë së tij, në ngritjen e grupit të ekspertëve me qëllimin evidentimin e problematikave që do të duhej të adresosheshin për tu përmirsuar. Puna e tij do të ishte e bazuar në rekomandimet shumë të rëndësishme që OSBE dhe ODIHR ka përpiluar per zgjedhjet e 2013 dhe ato lokale të vitit 2015. Qëllimi ka qene për të orientuar se ku duhet te ecte komisioni gjatë punës së tij.”- u shpreh Vasili.
Edhe pse i cilëson thelbësore kërkesat e saj për një proces të drejtë ligjor, LSI duket konfuze dhe e dobët përballë dy forcave politike PD-PS që ndryshuan sistemin zgjedhor në vitin 2008.
I pyetur nga Boldnews.al nëse do të ndryshojë mënyra e votimit duke krahasuar zgjedhjet parlamentare të 2017 me ato të 2013, Vasili u përgjigj: “Nuk mund të them sot se çfarë ndryshimesh do të ketë pasi kjo do të formësohet kur komisioni të mblidhet dhe të marrë në shqyrtim propozimet e shumta të ardhura nga subjektet politike parlamentare ose jo të tilla, ndaj e përsëris është herët për të folur se cilat do të jenë ndryshimet konkrete.”
Në vitin 2017 mbaron edhe mandati i Presidentit të Republikës por mënyra e zgjedhjes së tij ka mbetur pezull. “Nuk ka pasur ndonjë diskutim për këtë çështje.” – shton më tej Vasili.
Ndërkohë një ndër problemet kryesore për të drejtën e votimit është dhe kategoria e emigrantëve, të cilët me shumë gjasa nuk do të kenë mundësi të votojnë as në 2017. “Besoj që komisioni duhet ta shqyrtojë këtë problem.”– sugjeron kreu i grupit Parlamentare të LSI, Petrit Vasili.
Edhe kryetari i ri i KQZ-së, Denar Biba në një deklaratë të mëparshme shprehet se nuk ka kohë për ndryshime të sistemit zgjdhor. Duke parë procesin e ngadalshëm të reformës zgjedhore, kuptohet që mënyra e zgjedhjeve parlamentare të 2017-ës nuk do të pësojë asnjë ndryshim, pavarësisht premtimeve nga kjo mazhorancë.
I ashpër në kritika ka qënë edhe deputeti LIBRA-s, Ben Blushi, i cili deklaroi se Komisioni i Reformës Zgjedhor i ka mbaruar mandati më datë 9 dhjetor dhe për rrjedhojë dy partië kryesore, “Rilindja” dhe Partia Demokratike kanë thyer kauzën e tyre për zgjedhje të lira.
“Opozita dhe kjo mazhorancë e kanë tradhëtuar kauzën e tyre për zgjedhjet të lira. Nuk do të kemi asnjë votim për emigrantët, siç premtoi “Rilindja” para se të vinte në pushtet. Gjithashtu në këto zgjedhje që numërojnë votat nuk do të ndryshojnë, por do të vijojnë të jenë të politizuara. Pra, 4 parti do të numërojnë të gjithë votat e partive të tjera.”- u shpreh ai në një deklaratë për shtyp.
