Ministri i Shëndetësisë Ilir Beqaj, i deklaroi dje Kuvendit se studimet e fizibilitetit të Bankës Botërore për koncensionet janë sekrete.
Beqaj po jepte shpjegime mbi koncensionin e laboratorëve mjekësore të cilin po e përgatit dhe po e bën gati.
Por ministri është shigjetuar nga deputetët Albana Vokshi dhe Petrit Vasili në momentin kur deklaroi se një studim fizibiliteti për këtë koncension do të mbetej sekret dhe për deputetët.
Një deklaratë e paprecedentë e ministrit, sepse studimet e fizibilitetit bëhen pikërisht për të bërë transparencë dhe për të bërë të qartë rrethanat dhe përfitimet e privatizimeve apo të dhënies me koncension.
Më poshtë, debati i zbardhur në Komisionin e Shëndetësisë:
Ilir Beqaj: Studimi i fizibilitetit, i cili pothuajse ka mbaruar, (emisionin e fundit, IFC-ja e sjell javën tjetër) nuk mund të bëhet publik sepse ka elementë konfidencialiteti që nuk duhet t’i dinë gjatë përgatitjes së ofertave konkurrentët potencialë që pritet të marrin pjesë në këtë partneritet privat. Kjo është edhe këshillë e IFC-së. Privati ka detyrimin fillimisht që gjithë këtë personel ta marrë dhe pastaj, sigurisht, sipas të gjitha rregullave të marrëdhënieve të punës, do të vazhdojë zgjidhjet siç ndodh në çdo lloj shërbimi që ofrohet.
Në partneritetet publike-private, gjithë literatura bashkëkohore, janë eksperienca të suksesshme, në vende më të zhvilluara se ne, me kontrata…
Albana Vokshi: Ku, ku, ku?
Ilir Beqaj: Ku?
Albana Vokshi: Më thuaj tamam, ku?
Ilir Beqaj: Angli dhe Gjermani
Albana Vokshi: Mos fol gjëra që nuk i di, merr e lexo të paktën para se të shkruash në gazeta
Ilir Beqaj: Ai studim i BE-së është i shkurtit 2014 dhe pikërisht këtë thotë: Shëndetësia është sektori ku ka më shumë lëvizje se në çdo sektor tjetër brenda BE-së…
Albana Vokshi: Dhe kanë dështuar, dhe kanë dështuar shumica
Ilir Beqaj: …Dhe ndërkohë aty sugjerohet në PPP lejini shkallë të lirë operatorëve, të vijnë edhe ato me propozimet e tyre
Albana Vokshi: Jo, përkundrazi
Ilir Beqaj: Është e zezë mbi të bardhë
Albana Vokshi: Përkundrazi
Petrit Vasili: Pavarësisht nga komentet e drejtpërdrejta apo indirekte të bëra nga aktorë të ndryshëm, tani këtë po ta them drejtpërdrejt, meqenëse e vendosëm këtë standard. Nuk jam dakord me ju, nuk është një praktikë ku shërbimi kombëtar shendetësor i vendeve fillim e mbarim në parim trajtohen me koncension. Ju mund të kundërshtoni sa të doni, por një i tillë model mbarëkombëtar nuk ekziston, të paktën në vendet e BE-së. Ju thatë, në mënyrë korrekte të them të drejtën, që studimi i IFC-së është konfidencial. Në qoftë se është konfidencial, mos ecni të kërkoni votën e parlamentit, se nuk ju kemi votuar në parlament që ta bëni këtë studim.
Ky, në fund të fundit, ta dinë gjithë shqiptarët, studim fizibiliteti do të thotë në shqip, se fizibiliteti është një fjalë e bukur shumë, por në shqip do të thotë leverdisshmëria. Kam leverdi ta bëj apo nuk kam leverdi ta bëj. Dhe këtu nuk ka asgjë konfidenciale dhe unë ju kërkoj sinqerisht ta merrni mbrapsh. Asgjë konfidenciale nuk ka dhe në qoftë se është konfidenciale kjo, është e fshehtë, është e mbyllur, nuk e duam fare.
Edhe ky koncension është i dyshimtë pastaj. Ju keni bërë edhe një gabim tjetër që e keni futur në buxhetin e shtetit me një studim fizibiliteti të papërfunduar, sepse nuk ka përfunduar. Ne nuk kemi mundësi as t’ju pengojmë, s’kemi as votë që t’ju ndalim, por inicialiva pannacionale të këtij lloji me delegim total të shërbimit publik laboratorik në duart e privatëve, të plotë nga fillimi në fund, nuk gjen gjëkundi. Do parë ndryshe çështja e laboratorëve. Nuk ngjan kjo nismë me nisma të tjera të ndërmarra në fushën e partneritetit publik-privat./ Hashtag
VIDEO (TemA-TV/ Respublica.al):
