Deputetët e PS-së kanë braktisur sot Komisionin Hetimor të ngritur me kërkesë të opozitës për pajisjen e përgjimit “Imsi Catcher” , në të cilin ishte thirrur për të dëshmuar Drejtori i Përgjithshëm i Policisë së Shtetit, Haki Çako.
Kryetari i Komisionit Flamur Noka sqaroi anëtarët se ishte thirrur për t’u dëgjuar për pajisjen përgjuese, kreu i Policisë së Shtetit, Haki Çako, i cili ishte paraqitur.
Por deputetët socialist, Pjerin Ndreu dhe Paulin Stërkaj i kujtuan Nokës se me sjelljen e tij të pahijshme jo vetëm në seancën e fundit të Kuvendit, por dhe në raste të tjera, i kishte fyer kështu që ata në mënyrë demonstrative dolën nga salla.
Noka e vazhdoi mbledhjen duke bërë të qartë se deputetët kishin marrë porosi për ta lënë komisionin dhe për të mos u angazhuar për zbardhjen e së vërtetës lidhur me pajisjen “Imsi Catcher”.
DEBATET
Flamur Noka: Z. Çako, ndryshe nga më parë besojme se tani jeni në dijeni për këtë pajisje, sepse herën e parë thatë që nuk ishit i informuar. Tani shpresoj që jo vetëm për ne si komision hetimor për çështjen e pajisjes “Imsi Catcher”, jo vetëm për Kuvendin, por edhe për opinionin për këtë që u quajt një megaskandal dhe në vende të tjera ka pasur dorëheqje dhe ndjekje penale deri në nivele të larta, në Shqipëri të paktën opinioni të qartësohet për këtë pajisje dhe procedurat që janë zbatuar për futjen dhe administrimin e saj.
Pjerin Ndreu: (proteston duke kërkuar fjalën) Meqënëse z. Ndoka është edhe kryetar i Komisionit, dua të them që e ka bërë zakon shumë sjelljen e pahijshme dhe ne kemi bërë kërkesë për përjashtimin e z. Ndoka në Kuvend.
Flamur Noka: Ne jemi ligjvënës dhe e dimë që nuk do të zbatojmë çdo dëshirë tuajën. Nëse juve një ministër ju bën për një lek të gjithëve, ne si opozitë nuk e pranojmë…
Pas kësaj, socialistët kanë lënë sallën e komisionit.
