Nga Boldnews.al
Deputeti Ben Blushi, njëherësh një nga themeluesit e lëvizjes politike Lista e Barabartë (LIBRA) ka njoftuar sot në profilin e tij në facebook publikimin e librit më të fundit të quajtur “Kryeministri”. Subjekti i penës së mprehtë të Blushit, është Edi Rama por ai nuk citohet në romanin që pritet të ngjallë jo pak polemika.
Libri “Kryeministri” ka nisur të shitet në të gjitha libraritë e vendit teksa Boldnews.al ka mësuar disa detaje për përmbajtjen e këtij romani. Bëhet një fjalë për një ngjarje që është sa trillim por gjithashtu edhe realitet. Romani flet për situatën politike dhe ekonomike të vendit në vitin 2021 dhe për një kryeministër i cili është në fund të mandatit të tij të dytë qeverisës.
Populli është i gjithë kundër këtij kryeministri i cili ka thyer besimin e qytetarëve, i ka tradhëtuar ata dhe ka rritur indinjatën e tyre. Viti 2021 nuk është përzgjedhur rastësisht në këtë roman, pasi lë të kuptohet se do të jetë edhe fundi politik i kryeministrit aktual Edi Rama pas mbarimit të mandatit të tij të dytë.
Në roman, thuhet se në këtë kohë, situata është tepër dramatike, njerëzit janë të pashpresë, ekonomia është drejt rrënimit, shtresa e mesme drejt zhdukjes dhe shteti është pothuajse i falimentuar.
I gjendur përballë këtyre dështimeve “Kryeministri” kërkon mëshirën e popullit që i është kundërvënë ashpër. Ai kërkon një mandat të tretë qeverisës dhe për këtë krijon një situatë sa dramatike por edhe tragjike.
“Kryeministri” paguan një snajperist i cili më herët kishte qënë me mision në Afganistan dhe i kërkon këtij snajperisti që ta plagosë gjatë një mitingu që do të zhvillojë në kuadër të fushatës elektorale.
“Kryeministri” i cili nënkupton Edi Ramën, e porosit snajperistin që të bëj kujdes në shënjestër, kur ta qëlloj gjatë momentin që ai do të mbaj fjalim përpara turmës. Me këtë situatë “Kryeministri” i cili është i rënduar psikologjikisht mendon se do të mëshirohet nga populli dhe për rrjedhojë do të përfitojë mandatin e tretë qeverisës.
E gjithë situata në roman krijohet ashtu siç kishte kërkuar “Kryeministri”, snajperisti vendoset mbi një zonë ku sheh qartë objektivin dhe bëhet gati për ta plagosur përpara qindra qytetarëve. Por teksa mban gishtin tregues në këmbëzën e snajperit, ushtari nga Afganistani risjell në kujtesë vuajtjet që ka kaluar populli tij nga keqqeverisja e të gjithë kryeministrave dhe në veçanti e këtij të fundit.
I gjendur përballë vuajtjeve të popullit dhe një “Kryeministri” mitoman i cili e ka mbajtur pushtetin nëpërmjet propogandës, snajperisti vendos….
Ai shkrep armën e tij por duke e qëlluar “Kryeministrin” për vdekje. Snajperisti shkatërron planin diabolik të kryeministrit në ikje dhe të etër për pushtet dhe shfryn në këtë mënyrë mllefin e një populli të vuajtur.
Libri “Kryeministri” i Ben Blushit ka edhe detaje të tjera interesante që pritet të krijojë kurozitet tek lexuesit ndërsa promovimi bëhet javën e ardhshme kur nis Panairi Kombëtar i Librit.
Ben Blushi ishte shprehur edhe më herët se së shpejti do të ketë dy LIBRA, njëri krijimi i partisë “Libra” që flet për dritën dhe tjetëri dalja e librit “Kryeministri” që flet për errësirën.
