Presidenti Bujar Nishani deklaroi sot se do të thërrasë Këshillin e Sigurisë Kombëtare lidhur me situatën e kanabisit në vend.
Nga Shkodra kreu i shtetit tha se kanabisi ka marrë përmasa kombëtare dhe është “realisht problem, ofron vetëm kriminalitet”
Duke folur në një leksion të hapur në Universitetin “Luigj Gurakuqi” në Shkodër, Nishani tha se edhe fenomeni i korrupsionit duhet të luftohet dhe për ta bërë këtë nevojitet vullnet dhe dëshirë nga të gjithë aktorët.
Në këtë drejtim, Nishani vlerësoi rëndësinë e dixhitalizimit të shërbimeve si një proces që sipas tij ngushton rrugët e subjektivizmit. Duke folur për integrimin, Nishani u shpreh se Shqipëria e meriton hapjen e negociatave me BE.
“Gjykoj se Shqipëria e meriton hapjen e negociatave. Procesi zgjerimit të BE duhet të vazhdojë. Të mos bëhen diferenca me vendet e tjera të rajonit”. Nishani shtoi më tej se “e drejta e pronës është katandisur keq, duke u bërë objekt debatesh politike”.
