Ish-shefi Shërbimit Sekret Shqiptar Fatos Klosi është përfshirë në debatin mes ministrit të LSI-së Ylli Manjani dhe ministrave socialistë Mimi Kodheli dhe Saimir Tahiri, për ndërhyrjen e ushtrisë shqiptare në luftën kundër kultivimit dhe trafikimit të kanabisit.
Në një intervistë për “A1 News”, ish-shefi i SHIK, shprehet se duhet ndryshuar strategjia e luftës kundër kanabisit dhe se ky fenomen duhet të konsideruar nga qeveria si shoqëror dhe jo vetëm si kriminal. Klosi mbështet tezën e hedhur nga ministri i Drejtësisë për inkuadrimin e forcave ushtarake në terren, për të luftuar kultivimin dhe trafikimin e kanabisit. Sipas tij, situata është shumë shqetësuese dhe ky hap është i domosdoshëm.
Ish-drejtuesi i SHIK-ut (sot SHISH) e konsideron situatën e kanabisit në vendin tonë si një cenim të Sigurisë Kombëtare, prandaj edhe ndërhyrja me trupa të specializuara ushtarake është normale, madje edhe e domosdoshme.
“Nuk është hera e parë që ndodh që ushtria merret me probleme të brendshme. Në Itali janë karabinierët, që janë më të njohur se policia, është xhandarmëria në Francë dhe Spanjë. Nëse një fenomen e cenon rëndë sigurinë kombëtare, në këtë rast kanabisi, unë them që ushtria mund ta ketë këtë detyrë.
Reparte të caktuar të ushtrisë kërkojnë ligje të caktuara dhe duhet menduar, sepse ushtria nuk është vetëm për të shkuar në Afganistan, ne mirë bëjmë që kontribuojmë, por problemi i kanabisit në Shqipëri është më i rëndësishëm se Afganistani. Në Afganistan ne jemi për të shtuar numrin e atyre që kontribuojnë, ne nuk kemi shumë peshë atje, për këtë jam i sigurt. Por problem që kemi me kanabisin është më i madh”, deklaroi Klosi.
