Ministria Saimir Tahiri deklaroi se ishte sekuestruar mbi 98 përqind e drogës në vendin tonë, por operacionet e fundit e nxjerrin bllof.
Një sasi prej 520 kg kanabis është sekuestruar nga policia nga dy operacione në Tepelenë dhe Kurvelesh.
Si rezultat i operacioneve në vendin e quajtur “Minierat e Gusmarit”, në Kurvelesh në një objekt të braktisur u kap ne flagrancë shtetasi Astrit Selmani, 34 vjeç, banues në Borsh, Sarandë.
Nga kontrolli i ushtruar në këtë objekt u gjetën dhe u sekuestruan 30 kg lëndë narkotike Cannabis Sattiva e përpunuar dhe 180 kg lëndë narkotike në proces tharje.
Gjithashtu nga operacioni i zhvilluar në fshatin Nivicë, në afërsi të rezervuarit, në dy kasolle u konstatuan bimë narkotike në proces tharje.
Nga kontrolli i ushtruar në këto dy kasolle u gjetën 310 kg lëndë narkotike Cannabis Sattiva në proces tharje si dhe bimë të kultivuara. Bimët e kultivuara u asgjësuan në vend me anë të djegies.
Krujë
Ndërkohë Policia ka sekuestruar në Krujë 85 kg Cannabis Sattiva, 1 100 bimë në proces tharje dhe 1 900 të kultivuara dhe ka arrestuar në flagrancë 2 shtetas.
Specialistët për Krimet në Komisariatin e Policisë Krujë pas informacioneve të marra në rrugë operative, në vijim të punës së pandëprerë për parandalimin e kultivimit dhe prodhimit të lëndëve narkotike, në fshatin Kameras, Krujë kanë konstatuar bimë Cannabis Sattiva dhe ambiente që shërbenin për tharjen e tyre.
Janë arrestuar në flagrancë shtetasit e mëposhtëm:
1- Edrin Sulaj, 22 vjeç, banues në Mamurras, Kurbin;
2- E. C. 17 vjeç, banues në Krujë.
Gjithashtu filloi proçedimi penale në gjendje të lirë në ngarkim të shtetasit B.K, banues në Arrameras.
