Pavarësisht kundërshtimit të kryeministrit Edi Rama, Lëvizja Socialiste për Integrim mbetet e vendosur për të çuar përpara listat e hapura për deputetë, duke hapur në këtë mënyrë një tjetër front lufte më Partinë Socialiste.
Kreu i grupit parlamentar i LSI-së, Petrit Vasili, gjatë një prononcimi për mediat, theksoi se lista të tilla janë praktikë evropiane, duke shtuar se këtë ide do ta propozojë edhe në komisionin e reformës zgjedhore.
“Listat e hapura janë praktike evropiane, këtë do e propozojmë dhe në komisionin e reformës zgjedhore. Kundërshtitë për listat, secili ka opinionin e tij” u shpreh Vasili.
Ideja e listave të hapura për deputetë, u propozua pak ditë më parë nga kreu i Kuvendit, Ilir Meta, sipas të cilit, kjo formë e bën demokracinë e drejtpërdrejtë dhe demokratizon forcat politike. Por ky propozim deri tani ka hasur në kundërshtimin e Edi Ramës që ndihet komod me listat e mbyllura duke pasur në këtë mënyrë kontroll të plotë mbi deputetët.
