Teksa shfrytëzoi daljen publike të Guardia di Financa, Ministri i Brendshëm Saimir Tahiri tentoi t’i hedh hi syve të shqiptarëve duke thënë se në 2013 kishte më tepër kanabis të kultivuar se ditët e sotme.
“Shqipëria e 2016 ka kultivuar 30% më pak kanabis se Shqipëria e 2013, ndërkohë që Policia sot, për të tretin vit rradhazi shkatërron mbi 99% të hapësirës së identifikuar, përkundër vitit 2013 kur policia shkatërronte vetëm 7%.”- u shpreh Tahiri.
Por në fakt, që nga 2013 e deri tani Policia e Shtetit mburret se ka sekuestruar aq drogë sa të mblidhen 25 vite sëbashku. Në daljet televizive, drejtues të lartë të uniformave blu shprehen se brenda 3 viteve kanë arritur të asgjesojnë mbi 1.2 milion rrënjë kanabis.
Lidhur me “lapsusin” e policisë për drogën e sekuestruar, Tahiri u shpreh se janë ngatërruar 24 kg me 24 ton ndërsa kjo është fryrë edhe nga opozita.
“24 kilogram drogë, opozita, segmente të medias, dhe ca “lajme me burime të prokurorisë” i bënë 24 ton. E kur arrijnë të shpifin me tre zero nga pas, sa 24 kile ti bëjnë 24 ton, kuptoj edhe nga dolën 10 mijë tonët e Lulzim Bashës dje.”– shtoi më tej Ministri i Brendshëm.
Por Boldnews.al raportoi pak ditë më parë se në qytetin e Vlorës prej 2 javësh kishte nisur një aksion masiv për asgjesimin e drogës dhe vetëm në një magazinë mbaheshin të sekuestruara mbi 7 tonë drogë. Përveç kësaj, Boldneës.al publikoi mesazhet mes trafikantëve të drogës dhe bëhej fjalë për një rrjet të madh trafikantësh ku ishte i përfshirë edhe Drejtori i Policisë së Vlorës.
Nga Boldnews.al
