Më në fund, Edi Rama ka pranuar një gabim në ligjin e sapo miratuar për importin e plehrave. Jo për atë që mund të mendohet në diferencën mes mbetjeve apo plehrave, për rrezikun apo jo të hyrjes së mbetjeve radioaktive, as për sigurinë e doganave apo laboratorëve shqiptarë.
Jo, jo, ai ka pranuar gabimin më të paimagjinueshëm atë të PR, pra të marrëdhënies me publikun ku të gjithë e dinë se ai ka pikën më të fortë.
Në monologun që mban çdo të diel pasdite në Facebook, kryeministri ka pranuar gabimin se ai duhet ti kishte informuar më shpejt dhe më gjerësisht qytetarët për ligjin e ri dhe u shpreh i gatshëm ta bëjë këtë me çdo ambientalist të ndershëm. Por vetëm kaq. Për Ramën, gabimi nuk është se pse ndryshoi mendim në krahasim me vitet 2011, apo 2013, pse tha se kush do importojë plehra sot apo nesër (shiheni mirë edhe nesër) do ta bëjë këtë për interesa mafioze.
Për të gabimi me sa duket është se pse nuk ka arritur t’ia hedhë me kohë publikut. Por edhe ky “gabim” tregon diçka, fakti se debati për të nuk ka qenë transparent të lë të dyshosh se ndoshta ka pasur ndonjë gjë për të fshehur.
