Mijëra qytetarë dhe përfaqësues të Aleancës Kundër Importit të Plehrave janë nisur drejt Kryeministrisë për të kundërshtuar importin e mbetjeve në vendin tonë. Ata u mblodhën para pak minutash në Parku “Rinia” dhe po marshojnë përgjatë bulevardit “Dëshmorët e Kombit” me kartona të kuq në duar, duke simbolizuar kështu votën e tyre kundër importit të mbetjeve.
Edhe pse protestuesit zhvendosen para Kryeministrisë, kreu i Qeverisë nuk do të jetë aty, pasi paralelishit zhvillohet Asambleja e Partisë Socialiste.
Përfaqësues të AKIP thanë se qëllimi i kësaj proteste është që të tregojnë me forcën e zërit të qytetarëve kundërshtinë ndaj importit të mbetjeve.
“Ne do të kundërshtojmë ligjin për importin e mbetjeve. Jemi të hapur për të gjithë ata që e ndiejnë shqetësimin e situatës së rëndë ekologjike në vendin tonë”, thanë ata.
Protesta erdhi si një ‘revoltë’ fill pas miratimit të ligjit në Kuvend, ndërkohë që opozita ka deklaruar se do të jetë në mbështetje të protestuesve në këtë përballje, sipas Bashës, jo për kauzë politike, por si detyrim qytetar.
