Piloti italian, Guido Guidi që u rrëzua dje me avionin e tij tip “Piper” në grykëderdhjen e Ishmit është lënë i lirë në mesnatë por Prokuroria e Krimeve të Rënda ka shoqëruar për rreth 3 orë gazetarin investigativ Artan Hoxha për për nxjerrje të sekretit hetimor dhe i ka sekuestruar edhe 2 telefonat.
Gazetari i emisionit “Xhungël” deklaroi mbrëmë në “Opinion” se piloti italian Guido Andrea Guidi ka pranuar se e kishte ulur avionin në Ishëm për të testuar pistën, me qëllim që të kthehej më vonë për të trafikuar 200 kg hashash. Kjo u cilësua shkelje e rëndë nga prokuroria e krimeve të Rënda, që vendosi ta marrë në pyetje në mesnatë Artan Hoxhën.
Sipas procesverbalit të prokurorisë, Artan Hoxhës iu sekuestruan dy aparate celularë, një Iphone dhe një Samsung dhe kartat e telefonit. Me vendim të prokurorisë, këto sende janë sekuestruar si provë materiale, në lidhje me hetimin që ka nisur prokuroria e krimeve të rënda, shkruan Balkanweb. Në deklarimin e tij, gazetari Hoxha ka theksuar se nuk ka asnjë pretendim në lidhje me sekuestrimin e sendeve të tij personale.
Procesverbali
Pasi u morr në pyetje për rreth tre orë në Prokurorinë e Krimeve të Rënda nga prokurori Përparim Kulluri, Artan Hoxha është lënë i lirë rreth orës 2:50 të mëngjesit. Gazetari Artan Hoxha është pyetur për burimin e informacionit për dëshminë e pilotit italian të deklaruar në media. Hoxha pasi ka dalë nga prokuroria ka thënë se do të bëj çdo gjë për të mos dekonspiruar burimet e tij.
Gazetari deklaroi mbrëmë se ka edhe detaje të tjera që vërtetojnë se Guido Guidi nuk kishte ardhur për turizëm, por për trafik droge në Shqipëri. Dyshimet e tij, Hoxha i bëri publike: “Nga Ishmi në Rinas nuk është larg, mund të ulej në Rinas. Fakti që s’e ka bërë do të thotë se nuk ka dashur të lërë gjurmë që ka hyrë në hapësirën shqiptare”.
Hoxha nuk përjashtoi as mundësinë që piloti të jetë kontaktuar nga një grup kriminal,
duke u nisur edhe nga fakti që kompania të cilës i përket është e specializuar për udhëtime turistike.
“Ky lloj trafiku bëhet kur grupet kriminale kanë të ardhura të mëdha, të organizuara shumë mirë dhe të strukturuara. Këta lloj avionësh po t’u krijohet mundësia, mund të ulen në rrugë, në çfarëdolloj sipërfaqeje apo hapësire të territorit”-tha Hoxha.
Prokurorët e krimeve të rënda, konstatuan në vendin ku ra avioni, një pistë me gjatësi 1.5 deri në 2 kilometra, e cila rezulton të jetë punuar dhe sheshuar me mjete të tonazhit të rëndë ditët e fundit. Kjo bën që dyshimet e prokurorëve, për një rrjet trafiku drogë të shtohen ndjeshëm.
