Ish-kryeministri Sali Berisha ka hedhur akuza të rënda ndaj qeverisë duke thënë se droga transportohet nëpër Shqipëri me makinat e OSHEE-së.
“Pse do të merremi ne me fshatarin e thjeshtë që mashtrohet?! A e dini ju se ky ka një njeri më të afërt se këmishën në vjedhje? Ardian Çela quhet, ai terroristi i OSHEE.
A e dini se makinat e OSHEE e transportojnë në katër anët e Shqipërisë drogën? A e dini ju?
Duke folur më tej për fenomenin e drogës në vend, ish-kryeministri tha se “vetëm në Kurvelesh mbi 3.2 milionë rrënjë kanabis të mbjella. Të paktën 20 milionë rrënjë kanabis të mbjella në të gjithë Shqipërinë. E konfirmojnë raportet”, tha Berisha.
Berisha akuzoi kryeministrin Edi Rama i ka dërguar disa SMS Ymer Lalës, i cili sipas tij kontrollon 100 mijë rrënjë kanabis në Selishtë.
“100 mijë rrënjë janë në Selishtë nën kujdesin e Ymer Lalës. Rama i ka dërguar disa SMS Ymer Lalës. E di mirë ai. Le të dalë dhe t’i thotë këtu”, shtoi Berisha. I pyetur nga deputeti socialist Piro Lutaj se ku i kontrolloi këto SMS, Berisha tha se janë të tjerë ata që i kontrollojnë dhe ia venë në dispozicion.
“I kontrollojnë të tjerët dhe mi thonë. I kontrollojnë shërbimet partnere dhe mi thonë. Le të ngrihet të më thotë se s’kam dërguar asnjë mesazh. Ti (Lutajt) rri urtë, se ty të ka mbetur revolja për të mësuar qitjen”, u shpreh Berisha.
