Nga Boldnews.al
Edhe pse ishin zgjedhje të pjesshme, Dibra ishte edhe si një test për PS-në dhe PD-në një vit para zgjedhjeve parlamentare të përgjithshme, duke zgjidhur edhe disa ekuacione interesante në politikën shqiptare.
Për shkak të skandalit të ish-kryebashkiakut Shukri Xhelili, por edhe prej keqqeverisjes të së majtës, PD-ja kishte pritshmëritë që ta fitonte këtë test. Por ndodhi e kundërta.
Por përse erdhi humbja?
Një nga arsyet më kryesore ishte zgjedhja e kandidatit. Sherefedin Shehu, edhe pse një figurë e rëndësishme në selinë blu, ishte një figurë e konsumuar në qeverisjen 8-vjeçare të Partisë Demokratike.
Lëvizja e PS-së në këtë pikë ishte më e mirë, pasi zgjodhi për kandidat një mjek të zonës. Ndërsa Shehu, edhe pse dibran kishte vite që ishte larguar nga kjo zonë, aq sa nuk mundi dot edhe të votonte, pasi u regjistrua me vonesë.
Ndërkohë, lidershipi i PD-së bëri të njëjtin gabim si në vitin 2013, kandidatura e Shehut u zgjodh pa marrë mendimin e bazës demokrate në Dibër, të cilët mbetën të habitur kur mësuan se nuk do të ishte asnjë nga radhët e tyre si kandidat, por një “dibran” me banim në Tiranë.
Arsyet e tjera të humbjes ishte edhe zbritja e gjithë shtetit në Dibër.
Pjesa më e madhe e ministrave të saj, përfshirë me dhjetëra deputetë u shpërngulën në Dibër, duke e përqënduar artilerinë e rëndë në këtë zonë. Premtimet, blerjet e votave, bënë pastaj të vetën duke thelluar fitoren.
Basti i humbur i Metës
Por në zgjedhjet e Dibrës ka fitues dhe humbës edhe në koalicionin e majtës.
Edhe pse Ilir Meta pritet të thotë se votat e Lëvizjes Socialiste për Integrim shkuan për kandidatin e mazhorancës, e vërteta është pak ndryshe.
LSI zhvilloi një fushatë tejet të vakët në Dibër. Kreu i kësaj partie, Ilir Meta, nuk shkeli asnjë ditë në Dibër gjatë fushatës zgjedhore, madje mungoi edhe në mitingun përmbyllës të fushatës.
E gjitha kjo ndodhi prej futjes së PDIU-së në skemë. Meta kërkonte t’i linte të nënkuptonte Edi Ramës, se PDIU nuk ishte njësoj si LSI-ja dhe koalicioni i majtë nuk mund të merrte me çamët të njëjtën fitore si me LSI-në.
Nga ana tjetër, Partia e Shpëtim Idrizit doli në krye të fushatës në Dibër, duke lënë në hije LSI-në, madje aq sa dhe logoja e LSI shpesh hiqej nga makinat elektorale.
Pa dalë ende rezultati zyrtar i zgjedhje, PDIU-ja nxitoi që sot ti kërkonte Edi Ramës një post ministror.
Ndërsa Ilir Meta tashmë do ti duhet ti bëjë ndryshe llogaritë kur të ulet me Edi Ramën për të vendosur për të ardhmen e koalicionit në zgjedhjet e ardhshme.
