Nga Boldnews.al
Prej disa ditësh Policia Rrugore ka ndërmarrë një fushatë sensibilizuese për drejtuesit e automjeteve për vendosjen e rripit të sigurimit. Por duket se kjo fushatë më tepër të ofron një show pasi realiteti paraqitet ndryshe.
Sipas drejtuesve të Policisë Rrugore fushata pritet të mbaroj në datën 10 shtator, dhe deri në këtë datë do ketë vetëm këshillime ndërsa pas kësaj date do zbatohen masat administrative që parashikon Kodi Rrugor.
Për për Boldnews.al një drejtues automjeti denoncoi sesi i kishin vendosur një gjobë për rrip sigurimi në një kohë që po mbahej edhe “fushata” e policisë.
Qytetari i penalizuar në 28 gusht të këtij viti, Gent Çali shprehet për Boldnews.al se ai është ndaluar nga një efektiv i Policisë Rrugore i quajtur Arjan Uku dhe jo vetëm që nuk është këshilluar por i ka dhënë një letër ku të paraqitej në Organin Administrativ (të njohur si Komision) për mosvendosje të rripit të sigurimit.
Pasi është paraqitur në Organin Administrativ brenda afatit 5-ditor, atij i është komunikuar një masë administrative prej 70 mije lekësh (të vjetra) si pasojë e mosvendosjes së rripit të sigurimit.
Kodi rrugor i ndryshuar parashikon që për mos zbatim të nenit 170, masa administrative varion nga 5.000 deri në 15.000 lekë , si dhe masa plotësuese pezullim i lejes së drejtimit nga 6 muaj deri në një vit.
Kjo tregon edhe njëherë se Policia Rrugore vepron me dy standarde, ku nga njëra anë ofron foto dhe video të fushatës së shtirur për drejtuesit e automjeteve dhe nga ana tjetër plotëson blloqet e gjobave të majme ndaj drejtuesve të automjeteve.
