Është ndarë sot nga jeta, në moshën 78-vjeçare, ish-futbollisti i njohur i viteve 60-të, Lin Shllaku. Ish-kapiteni i Partizanit dhe i ekipit tonë përfaqësues, i cili vuante nga një sëmundje në mushkëri, u shua në ambientet e spitalit “Shefqet Ndroqi”, ku edhe qëndronte i shtruar prej disa ditësh.
Klubi i Futbollit “Partizani” i shprehin ngushëllimet më të sinqerta familjes dhe të afërmve për humbjen e njeriut të tyre më të dashur. Lin Shllaku, i lindur në Shkodër, ka qenë një prej lojtarëve më të spikatur të futbollit shqiptar, me një karrierë të pasur, ku në 15 kampionate kombëtare, ai koleksionoi 7 tituj kampioni, 7 Kupa Republike, medalje argjendi në turnetë ndërkombëtarë të Lajpcigut e Hanoit, fitues i 1 Kupe Ballkanike me klube.
7 vjet, Lin Shllaku ishte kapiten i Partizanit dhe i ekipit Kombëtar. Me ngjyrat kuqezi ka luajtur 15 ndeshje. Në 70-vjetorin e themelimit, Klubi i Futbollit “Partizani” i akordoi Lin Shllakut edhe titullin “Mjeshtër i Madh”.