Një gjykatë në Turqi ka lëshuar urdhër arrest për klerikun me seli në SHBA, Fethullah Gulen, i cili akuzohet për orkestrimin e grushtit të shtetit të 15 korrikut në Turqi. Lajmi është bërë i dituar nga media shtetërore turke.
Pak ditë më parë, Shtetet e Bashkuara i kërkuan Turqisë që të dorëzojë provat që lidhin imamin Fetullah Gulen me grushtin e dështuar të shtetit. Ankaraja ka kërkuar prej Uashingtonit ekstradimin e imamit që Erdogan e ka akuzuar publikisht se qëndron pas përpjekjes së ushtarakëve për ta rrëzuar nga pushtetit.
Veç kërkesës për më shumë prova, Departamenti i Shtetit lëshon edhe një paralajmërim për autoritetet turke.
Sekretari John Kerry kërkoi prej tyre që gjatë hetimeve të respektojnë ligjet në fuqi dhe foli për dëmtim të marrëdhënieve mes dy vendeve nga deklaratat publike të disa zyrtarëve turq, që sugjerojnë se Uashingtoni luajti rol në zhvillimet e fundjavës në vend.
