Nga Boldnews.al
Mazhoranca qeverisëse duket se po kalon momentet më të vështira në këto ditë vere, ndërsa krijimi i një qeverie teknike po artikulohet herë pas here si zgjidhje e vetme. Kryeministri Edi Rama është vënë në vështirësi nga aleati i tij në qeveri, Ilir Meta i cili i kërkon ndryshime në kabinetin qeveritar.
Për këtë gjatë drekës së sotme një helikopter është ulur në Vilën qeveritare në Dhërmi, aty ku Rama ka nisur pushimet prej disa ditësh. Nga dera e helikopterit ka zbritur ish kryeministri Britanik, Tonny Blair, njëherësh edhe këshilltar i kryeministrit të Shqipërisë, Edi Rama.
Mediat pranë qeverisë raportojnë se vizita e Blair ka të bëjë me zgjedhjen personale të politikanit britanik pasi ai ka vendosur të kalojë disa ditë pushimesh në Dhërmi dhe për këtë është akomoduar tek Vilat Qeveritare.
Por burime të mirëbesuara bëjnë me dije për Boldnews.al se Blair nuk ka ardhur vetëm për pushime në Dhërmi. Kjo pasi mësohet se ish kryeministri britanik ishte me pushime në një shtet fqinj dhe vizita e tij në Shqipëri ka qënë me kërkesë të kryeministrit Rama.
Si këshilltar “pa para”, Blari pritet të ofrojë asistencë për zgjidhjen e mosmarrëveshjeve mes dy partive të majta PS-LSI. në drejtësi, pakënaqësitë në radhët e ministrave si dhe thikat pas shpine mes njëri-tjetrin janë disa nga arsyet të mendosh se krijimi i një qeverie teknike mbetet zgjidhja e vetme.
Por kryeministri Rama duket se po përballet edhe më luftën brenda llojit. Një nga eksponentët kryesor të Partisë Socialiste, Koço Kokëdhima është kthyer në kundërshtarin kryesor të tij. Kokëdhima është parë i afruar me Metën, ndërsa nuk ka munguar edhe një drekë ditët e fundit mes tyre por edhe në praninë e ish presidentit Rexhep Mejdani, një tjetër zemërthyer nga qeverisja Rama.
Afrimi mes Metës dhe Bashës është një tjetër çoroditje për kryeministrin Rama. Ata të dy u fotografuan bashkë në një vizitë zyrtare në Uashington. Po sot në aeroport Meta-Basha janë parë teksa janë nisur që të dy në një tjetër vizitë, por kësaj here në Vjenë.
Teksa Ramës i ka dalë situata nga duart, nuk dihet se çfarë do të propozojë Blair. Ndërkohë burime të sigurta pranë kryeministrisë bëjnë me dije për Boldnews.al se ish kryeministri britanik Tonny Blair pritet të shtojë praninë e tij në Shqipëri duke shfaqur kështu mbështetjen e hapur ndaj kryeministrit Edi Rama, në prag edhe të zgjedhjeve elektorale 2017.
Kush ja paguan “pushimet” Blair?
Nuk dihet nëse kjo vizitë e ish kryeministrit Tonny Blair është mbuluar nga shpenzimet e buxhetit të shtetit apo donatorë që janë pranë kryeministrit Edi Rama.
Por në raportimet e mëparshme të mediave, qeveria shqiptare ka kryer një sërë pagesash ndaj familjes Blair. Në total kryeministri Rama i ka lëvruar me një vendim qeverie 645 mijë euro studios ligjore në pronësi të bashkëshortes së Blair, Cherie.
Pagesa është kryer pas dy faturave të lëshuara nga studio juridike e Znj. Blair në datat 13 dhe 18 shkurt 2015, për kohëzgjatjen e angazhimit të Omnia Strategy në çështjen Rapiscan.
Familja Blair njihet për shifrat marramendëse që përfiton nga këshillat që ofron ndaj vendeve me demokraci të brishtë. Ish kryeministrit Tonny Blair është këshilltar edhe pranë qeverisë së Kazakistanit dhe paguhet nga presidenti autokratik i këtij vendi, Nursultan Nazarbayev.
