Nga Boldnews.al
Dy njoftime u dërguan sot nga Policia e Shtetit për asgjesimin e disa rrënjëve kannabis sattiva në Tepelenë dhe Shkodër. Nuk dihet nëse këto aksione janë kryer sot, por zyra e shtypit në Policinë e Shtetit u kujdes që t’i dërgonte sot pasdite duke i raportuar si ngjarje të “suksesshme”.
Policia e Shtetit u vendos në panik sot paradite nga një video e publikuar nga Partia Demokratike e që më pas rezultoi e vertetë se kishte dalë nga uniformat blu.
“30 përqind e fitimit të cdo bime të mbjellë, ndahet mes shefave të policisë dhe Tahirit. Ky është pazari që garanton mbjelljen, rritjen, korrjen dhe transportin e drogës. Pamjet janë filmuar pikërisht në zonën e Lumit të Vlorës, aty ku Habilajt e Tahirit kanë kontroll absolut mbi territorin.”– shprehej Ervin Salianji, Sekretari për Aksionin Qytetar në PD.
Aksioni i parë i publikuar pasditen e së premtes ishte asgjesimi i 1720 rrënjë kanabis nga Policia e Tepelenës ndërsa 2 persona përfunduan në pranga. “Të arrestuarit janë Ylleson Shuli , 64 vjeç, banues Korçë, Aldo Halili, 20 vjeç, banues në Durrës si dhe u bë shpallja në kërkim e shtetasit A.H. Gjatë kontrollit në vendin e quajtur “Gropa e Vodicës” në fshatin Beçisht,Tepelenë ,u gjetën dhe u asgjësuan me anë të djegies 1720 bimë e dyshuar Canabis Sativa.”- thuhej në njoftim.
Ndërsa aksioni i dytë ishtë në qytetin e Shkodrës, ku u arrestuan 2 persona pasi iu gjetën pranë banesës së tyre një sasi prej 866 rrënjë kanabis.
“Policia ekzekutoi urdhër arrestet për S. Curraj dhe N. Botinaj.”– thuhej në njoftimin e radhës.
Përveç raportimit të sukseseve, Zyra e Shtypit në Policinë e Shtetit duket se ka vepruar me dy standarde. Kjo pasi gjatë ditës së sotme nuk dërgoi asnjë njoftim për mediat për shkarkimet apo lëvizjet në Policinë Rrugore, pavarëisht se ishte fokusi kryesor i mediave online. Ndërkohë që u kujdes sesi të kuronte imazhin përballë skandalit të publikuar nga një forcë politike.
