Shtypi i ditës sot ka pasqyruar aktualitetin politik dhe atë që po ndodh me reformën në drejtësi ndërsa pjesa më e madhe e titujve të gazetave flasin për rënien e qeverisë.
Mes tyre nuk bën përjashtim as gazeta “Shekulli”, e përditshmja e ish-deputetit Koço Kokëdhima, i cili me sa duket është kthyer në ‘armikun’ e kryeministrit Edi Rama, pas heqjes së mandatit nga Kushtetuesja.
Shekulli hapet me Metën e ndërsa në titullin e dytë të madh shfaqet qëndrimi i Kokëdhimës: “Reforma në Drejtësi, si dhunohet Kushtetuta dhe Shkelet Sovraniteti vendit” dhe më pas në 6 faqe kushtuar reformës shpjegohet se roli i të huajve rregullohet në bazë të marrëveshjeve ndërkombëtare dhe jo përmes Kushtetutës, siç dhe kërkon Rama.
Shekulli thekson se jo vetëm me këtë draft shkelen nenet 2 dhe 3 të kushtetutës por se sovraniteti i vendit u ofrohet në pjatë të argjendtë ndërkombëtarëve.
Me sa duket Kokëdhima, ashtu siç po flitet prej kohësh është afruar edhe në mendime me aleatin e Ramës në qeveri, Ilir Metën.
Gazeta Shekulli flet për nevojën enjë marrëveshje politike përmes së cilës të sigurohet edhe votimi i reformës në drejtësi.
“Reforma në drejtësi parashikon se në Shqipëri do të vendoset një Operacion Ndërkombëtar Monitorimi, i udhëhequr nga Komisioni Evropian së bashku me partnerët, për të mbështetur procesin e rivlerësimit (të gjyqësorit, në kuadrin e integrimit Europian dhe të bashkëpunimit Euro-Atlantik. Afati i operimit është i pacaktuar. Misioni ndërkombëtar do të funksionojë në Shqipëri deri në vitin 2027. Por sipas juristëve, vendosja në Shqipëri e një Operacioni Ndërkombëtar të Monitorimit nuk mund të rregullohet me anë të Kushtetutës, por vetëm sipas normave të së drejtës ndërkombëtare, nëpërmjet një marrëveshjeje ose Traktati dypalësh ose shumëpalësh midis Republikës së Shqipërisë, Bashkimit Europian dhe shteteve të tjera”-shkruan Shekulli.
