Ministri i Brendshëm Saimir Tahiri është kapur në befasi sot pas pyetjes së gazetares së TVSH-së. Ndërsa ajo e ka pyetur për një urdhër-arrest të mundshëm ndaj tij, Tahiri i ka kërkuar të përsërisë pyetjen pasi nuk e ka pritur një pyetje të tillë.
Gazetarja: Ju personalisht keni pasur çështje gjyqësore, keni patur probleme me gjyqësorin, ju dhe familja juaj. Mos është kjo një “luftë personale”? Flitet që ka një urdhër-arresti të firmosur nga Prokuroria në lidhje me hetimet për përgjimet, por që ngelet peng se nuk po gjejnë gjyqtarin.
Tahiri: Nuk e kuptova pyetjen. Flitet që ka një urdhër arresti…?
Gazetarja e TVSH: Për ju! Në lidhje me çështjen e përgjimeve, por flitet se nuk po e gjejnë gjyqtarin.
Tahiri: Unë nuk merrem me këtë. Çështjen konkrete ta vlerësojnë institucionet përkatëse. Mua më mbetet të përsëris atë që kam thënë. Që gjithçka kam deklaruar në çdo deklaratë dhe mundësi që kam pasur për të komunikuar nëpërmjet jush me publikun për sistemin gjyqësor në tërësi, apo duke drejtuar gishtin nominalisht për ata gjyqtarë, unë i qëndroj pikë për presje dhe nuk lëviz asnjë sekondë me çdo kosto.
Tahiri është marrë pyetje sot për 45 minuta nga 2 prokurorë pas akuzave të tij për gjyqtarin Arian Aliaj dhe gjithë institucioneve të drejtësisë, për të cilat KLD e paditi në Prokurori.
