Pasi “tronditi” tregun politik global me sulmet kundër kandidatit për President të SHBA, Donald Trump, kryeministri i Shqipërisë Edi Rama u rikthye në çështjet Europiane, pasi mesditën e së Mërkurës deklaroi se “britanikët morën vetën në qafë që votuan kundër daljes nga Bashkimi Europian.
Në një konferencë monolog për media, ku doli para shqiptarëve për të treguar se Partia Demokratike ka refuzuar, sipas tij, planin e SHBA-së për Reformën në Drejtësi, Rama u shpreh se politika shqiptare duhet të votojë reformën në drejtësi, që të mos bëjë gabimin e Britanisë së Madhe, që vendosi të mos jetë pjesë e Bashkimit Europian.
Madje, për të forcuar idenë e tij për gabimin e anglezëve, të cilët kanë konsoliduar një prej demokracive më të forta në botën e qytetëruar, kryeministri ynë, me nota shumë serioze, përdori shprehjen tipike shqiptare “ata (britanikët) morën vetën në qafë”.
“Boldnews.al” do të qëndrojë në pritje të reagimeve publike dhe mediatike nga Britania e Madhe, pasi zyrat britanike në Shqipëri të përkthejnë dhe të përcjellin në Londër shprehjen popullore, të artikuluar nga kryeministri.
Qëndrimet e Ramës për politikën globale tashmë janë kthyer në një “rutinë”. Pak muaj më parë, ai përsëriti vazhdimisht akuzat ndaj Donald Trump, kandidatit republikan për President të Shteteve të Bashkuara të Amerikës. Madje, gjatë një vizite në SHBA, Rama e përmendi shpesh se “zgjedhja e Trump do të jetë një kërcënim për Shtetet e Bashkuara”. Në një intervistë për gazetarin e njohur të CNN, Richard Quest Rama tha se “deklaratat që dëgjohen kohët e fundit nga Trump janë frikësuese”.
Por në këtë pikë ka ndërhyrë, gazetari, duke i tërhequr vëmendjen se kishte dalë nga gjuha e zakonshme diplomatike, duke folur për zgjedhjet e një vendi tjetër.
Rama u përgjigj se nuk po flet për zgjedhjet e një vendi tjetër, por sipas tij është duke përsëritur atë që kanë thënë edhe zyrtarë të tjerë të Bashkimit Europian.
Po ashtu, Edi Rama, në një intervistë dhënë “Fox News” gjeti edhe disa “gabime” të Putinit dhe Rusisë së tij në përfshirjen e konfliktit sirian.
Është aq e gjerë përfshirja e kryeministrit të Shqipërisë në politikën globale, sa edhe “rivalët” tanë të përjetshëm, serbët, e pranojnë hegjemoninë e tij. Kryeministri Serb, Aleksandër Vuçiç nuk e kursen aspak ironinë e tij, kur shprehet se Rama është lider global, ndërsa ai është vetëm një lider i vogël rajonal.
