Pas përplasjes verbale mes deputetit socialist Ben Blushi dhe deputetes së PDIU-së Mesila Doda për autorësinë e amendamenteve për zgjedhjen e Presidentit, ka ndërhyrë edhe kreu i PDIU, Shpëtim Idrizi. Ky i fundit nuk e ka kursyer ‘fjalorin e pasur’ gjatë kohës kur ka numëruar akuzat ndaj Blushit, të cilin e ka quajtur mashtrues. Nga ana tjetër Blushi ka kërcënuar: “Mbylleni këtë debat nëse nuk doni t’iu kthej në estradë”.
“Blushi e ka nisur keq aktivitetin e ri politik. E ke nisur keq, pasi sulmove një zonjë. Ti Ben mashtron kur thua se ke 10 firma. Zoti Muhedini u ngrit përpara dhe tha se firma e tij nuk është. Pra ti mashtron dhe nuk ke 10 por 9 firma”, tha Idrizi.
“Ti e ke nisur keq aktivitetin politik. Ti i ke ngulur thikën partisë tëndë”, ka theksuar Idrizi.
Ndërsa deputeti Ben Blushi para se të largohej nga seanca tha se nuk e pranon gjuhën vulgare me të cilën i janë drejtuar deputetët e PDIU-së dhe kërkoi të mbyllet ky debat.
“Nëse nuk doni t’ju kthej në estradë vazhdojeni këtë debat, por kam frikë se do mbaheni mend për ca gjëra që s’do donit”- tha Blushi.
“Unë e kam fituar jetën time në disa mënyra, njëra nga mënyrat është që të bëj libra. s’kam as kohë, as arsye, as frymëzim, që ti të kesh privilegjin të jesh personazh i librave të mia. Nuk e kuptoj për kruheni ju. Unë bashkë me disa deputete kemi bërë një amendament, që presidentin ta zgjedhë populli. Gjuha që përdore ishte vulgare. Unë nuk kam ndërmend të bëj debat këtu, kur del dikush dhe më thotë na ke vjedhur na ke grabitur, ke vjedhur dorëshkrime, libra. Çfarë kemi vjedhur? Jeni mirë apo s’jeni mirë. nuk ju vlen të hyni në debat me mua, ka shumë arsye por s’mund t’ia lemë kohës. Po ti more Shpëtim ku je në opozitë apo në pushtet. Unë ta them ku jam, jam në opozitë me shumë gjera që s’më pëlqejnë, nuk do shkoj me PD-në. Për çfarë votoni ju për qeverinë apo opozitën me çfarë programi keni ardhur në pushtet? Unë jam në opozitë me çdo gjë që nuk me pëlqen në këtë vend. Mëkërkoni ndjesë për gjuhën, këtë lloj gjuhe nuk ja pranoj askujt”- deklaroi Blushi.
