Nga Boldnews.al
Boldnews.al ka arritur të sigurojë në mënyrë ekskluzive disa foto të një prej personave më të lakuar të botës së krimit në Shqipëri, Emiljano Shullazi. Prej vitesh, sa herë përmendet emri i tij, në media qarkullojnë vetëm disa foto të vjetra, që datojnë në vitin 2006.
Emiljano Shullazi u arrestua pak muaj më parë, si i dyshuar për “gjobvënie” ndaj disa biznesmenëve, si edhe për kanosje ndaj kandidatit për rektor të Universitetit të Tiranës, Mynyr Koni. Arrestimi i tij u realizua mesnatën e 17 Prillit 2016, pas një urdhëri ndalimi të Prokurorisë për Krime të Rënda. Kjo ngjarje u shoqërua edhe me një përplasje të fortë ndërmjet Policisë dhe Prokurorisë, pavarësisht se të dy institucionet e mohuan diçka të tillë.
Gjithësesi, ajo që u konstatua lehtësisht nga media, ishte fakti që arrestimi i Shullazit nuk u shoqërua me “video spektakolare” të Policisë, si në shumë raste të tjera. Madje, as edhe një foto nuk u publikua nga policia për këtë personazh, për të cilin opozita e djathtë pretendon se ka lidhje të fuqishme me ministrin e Brendshëm, Saimir Tahiri. Arrestimi i tij u shoqërua me debate të ashpra politike, si edhe me tërheqjen publike të disa biznesmenëve, për të cilët mendohet se janë “viktima” të gjobvënies nga ana e grupit të Shullazit.
Prej vendosjes së tij në pranga, në publik kanë dalë shumë të dhëna mbi aktivitetin e tij, përveç një detaji të vogël. Asnjëherë nuk u publikuan pamjet e arrestimit dhe as të dërgimit në gjykatë.
“Boldnews.al” ka arritur të sigurojë disa foto të tij, gjatë momenteve kur po lëvizte nga burgu 313 për në sallën e Gjykatës për Krime të Rënda, ku po paraqitej për të zhvilluar seancën rutinë të kërkesës së Prokurorisë për vijimin e mbajtjes së tij në masën e sigurisë “arrest në burg”.
