Partia Socialiste nuk dha asnjë detaj se çfarë përmban propozimi i fundit i ardhur nga SHBA-ja për të zgjidhur ngërçin e Reformës në Drejtësi.
Kryetari i Komisionit të Posaçëm të Reformës, Fatmir Xhafaj, deklaroi sot pas mbledhjes së Grupit parlamentar socialist se “nuk flas për çështjet që janë në dialog, nuk është serioze, nuk tregon pjekuri politike që t’i bësh publike.”
Nën presionin e gazetarëve se propozimi është bërë tashmë i ditur nga PD, Xhafaj theksoi se “unënë nuk bëj pjesë tek ata; gjeni atë të PD-së t’ua thotë”.
Xhafaj vuri në dukje se “unë jam përfaqësues i PS dhe Kryetar i Komisionit të Posaçëm, nuk jamë përfaqësues i PD-së, që para se të ulem si negociator, të marr dijeni nga televizionet për atë që do të negociojmë.
Unë kam respekt për punën tuaj, për faktin se rrini me orë në diell e na prisni, por kjo nuk do të ishte shenjë pjekurie politike.
I pyetur për letrën me sqarime që i kërkonte kreu i Grupit Parlamentar të LSI-së, Petrit Vasili, për dyshimet se a mos LSI-ja ishte duke u anashkaluar në negociatat mes palëve, Xhafaj sqaroi se “ishte një marrëdhënie me partnerin tone të koalicionit, ishte kërkesë e kreut të Grupit të LSI-së që të informohej për negociatat.”
Po ashtu, i pyetur nëse negociatat tashmë janë duke u zhvilluar diku tjetër, Xhafaj tha: “Nuk është e vërtetë se negociatat janë spostuar në një seli tjetër të qeverisë; unë njoh deri në detaje si kryetar i Komisionit, çdo propozim që i shkon PD-së.
LSI nuk është ndier e anashkaluar. Z.Vasili është anëtar i Komisionit të Posaçëm dhe është i pranishëm në çdo mbledhje, bën pyetje, vlerësime, propozime dhe jep mendime; është një ndër anëtarët aktivë të këtij komisioni.
