Pavarësisht se 10 deputetë të Kuvendit të Shqiëprisë dhe 10 mijë qytetarë janë shprehur në mbështetje të zgjedhjes së Presidentit nga populli, ndryshimi i Kushtetutës për këtë nen, duket se nuk është i afërt. Kjo pasi për ta përfshirë në punimet kuvendore, amendamenti kërkon 28 vota dhe deputetët e partive të mëdha kanë heshtur për ta përqafuar nismën. Edhe peticioni online, veçse një dëshmi e vullnetit të shqiptarëve dhe vlerë morale, nuk ka asnjë vlerë ligjore.
“Do të sjellim një amendament që shpresoj ta pranoni në parim, pavarësisht se ai kërkon 28 vota sipas Kushtetutës për tu futur në proçedurë sipas të cilit, Presidenti i Republikës së Shqipërisë duhet të zgjidhet me votë direkte nga populli shqiptar.”– u shpreh Blushi pak ditë më parë.
Që kur prezantoi inisiativën e tij dhe të koleges Mimoza Hafizi, deputeti Ben Blushi nuk e fshehu pasigurinë se kolegë të tjerë do ta përqafonin projektin e ndryshimit të Kushtetutës.
Në fakt, afro 3 javë nga prezantimi i amendamentit, numri i firmave të hedhura mbi propozim është vetëm 10, pasi veç 8 deputetëve të tjerë që iu bashkuan inisiatorëve, nuk i janë bashkuar kolegë të tjerë.
Por ky projekt, rrezikon të mbetet vetëm një shrpehje vullneti e 10 përfaqësuesve nga populli, pasi pa firmat e 28 deputetëve, amendamenti nuk mund të jetë pjesë e punimeve të kalendarit të Kuvendit.
Edhe në rast se këto vota sigurohen, programi i punës së Kuvendit tashmë është përcaktuar dhe sërish është në dorën e një marrëveshje politike, për ta përfshië atë në ndyrshimet kushtetuese të reformës në drejtësi. Prandaj Mimoza Hafizi, jo më kot kishte këtë thirrje.
“I pyesim sot partitë PS, PD, LSI, a janë për zgjedhjen e Presidentit nga populli? Nëse janë, pse nuk firmosin amendamentin?”– u shpreh Hafizi pak ditë më parë.
Me sa duket edhe Hafizi edhe Blushi e dinin këtë skenar që politika do fliste me heshje për propozimin e tyre, prandaj dhe iu drejtua qytetarëve për të firmosur një peticion online për zgjedhjen e Presidentit nga populli.
Por firmat online, afro 10 mijë të qytetarëve kanë vetëm një vlerë morale, pasi ligjërisht vetëm 28 firmat mund të kthejnë në ligj dëshirën e tyre.
Por deri më tani, dëshirat e tyre dhe të politikës, duket se nuk janë të njëjta.
