Kryeprokurori Adriatik Llalla është takuar mesditën e sotme me Ministrin e Brendshëm, Saimir Tahir me të cilin ka konsumuar edhe një drekë pune, por duket se ky takim nuk ka shkuar aq mirë.
Sipas informacioneve që disponon ‘News24’ Tahiri ka drekuar me Llallën në një nga lokalet e kryeqytetit për rreth 1 orë. Sakaq, nuk dihet ende motivi i takimit mes dy krerëve. Pasi kanë lënë ambientet e lokalit, Tahiri dhe Llalla nuk kanë preferuar të flasin për mediat.
Ata kanë dalë të nervozuar nga lokali, raporton Balkanweb. Po ashtu, Tahiri e kryeprokurori kanë zgjedhur që edhe rrugët t’i bëjnë të ndara, ku Llalla hipi menjëherë në automjetin e tij, ndërsa ministri eci për rreth 20 metra në këmbë e më pas u fut në mjet.
Takimi vjen pas disa ngjarjeve të rënda, siç është grabitja e 30 qershorit në Rinas. Persona të maskuar dhe armatosur grabitën një shumë afro 1 milion euro, që i përkisnin një banke të nivelit të dytë.
