Teksa priten rezultatet nga laboratori për paruken e grabitësve nëse do të gjenden gjurmë gishtar, hetuesit kanë dyshime të forta se njëri prej autorëve është ose ka qenë punonjës në aeroportin ‘Nënë Tereza’.
Në këtë aspekt, policia dyshon për drejtuesin e automjetit të grabitësve, pasi nga analizimi i kamerave të sigurisë, rruga që përshkoi mjeti brenda pistës, dihet vetëm nga personeli, shkruan “Panorama”.
Për këtë arsye, prokurorët kanë kërkuar nga autoritet e aeroportit një listë të punonjësve që ditën e grabitjes kanë qenë pushim, si dhe një listë me emra të atyre që janë larguar nga puna.
Të arrestuar për këtë ngjarje janë 5 persona, punonjës të kompanisë që siguron perimetrin e pistës dhe të kompanisë që ruan paratë. Të gjithë sot u lanë në arrest me burg nga Gjykata e Krujës.
