Mero Baze dhe gazeta “Tema” bëhen pjesë e fushatës për zgjedhjet brenda Partisë Demokratike. Në një artikull të disa ditëve më parë gazeta “Tema” sulmon hapur Arben Sefgjinin si kandidat për kryetar të njësisë 7 ndërsa nuk përmend fare rivalin e tij, kryetarin në detyrë, Lefter Kostenja Gështenja. Sipas Temës kandidimi i Sefgjinit është kthim në kohërat e errëta të PD-së.
Burime të Boldnews bëjnë me dije për lidhje nepotike të kandidatit Lefter Kostenja me deputetin socialist Taulant Balla. Gazeta “Tema”, një mbështetëse e flaktë e së majtës në pushtet, duket se po investohet në mbështetjen e kandidatëve të cilët kanë lidhje të forta me zyrtarë të lartë të selisë rozë siç është edhe rasti i Kostenjës me lidhjet e tij familjare me Taulant Ballën.
Gazeta “Tema” nuk përmend faktin se zoti Kostenja është çuar për procedim penal nga KLSH-ja për abuzim me detyrën gjatë kohës që shërbente si drejtor i Drejtorisë Teknike të Autoritetit Rrugor Shqiptar.
Lefter Kostenja, sipas një raporti tjetër të KLSH-së, në projektin 2012-2013, ka pranuar investime me dy standarde për veprat e artit përgjatë autostradës Kukës-Morinë-Loti 1. Aktualisht zoti Kostenja ka drejtuar degën e Partisë Demokratike njësia 7 ku rezultatet e zgjedhjeve të fundit ishin më të ulëtat në historikun e PD për këtë njësi.
Simpatizantë dhe anëtarë të PD-së flasin për një përçarje dhe inkompetencë të këtij drejtuesi gjatë fushatës elektorale dhe organizimit të Partisë Demokratike për zgjedhjet vendore të 21 qershorit 2015.
Nuk dihet ende se përse po e lejon zoti Basha një kandidim të tillë ndërsa edhe e deleguara e kësaj njësie Albana Vokshi ende nuk ka mbajtur një qëndrim brenda normave statutore për zotin Kostenja.
Duket se ndërthurja e disa biznesmenëve të ndërtimit të lidhur me afera të dyshimta gjatë kohës që zoti Kostenja ishte zyrtar i lartë i Autoritetit Rrugor Shqiptar dhe lidhjet e tij familjare me njerëz të pushtetshëm të së majtës, janë një garanci për avantazhin e tij në garën brenda PD-së, ndërsa kuptohet që ai do ua kthejë nderin në zgjedhjet e radhës nëse arrin të zgjidhet duke e çuar të djathtën poshtë e më poshtë në një zonë ku Lulzim Basha fitoi dhe nisi karrierën e tij politike në vitin 2005.
(Boldnews)
