Bashkia e Durrësit ka akorduar një fond prej 21 milionë lekësh të vjetra për të blerë preparate për mirëmbajtjen e ujit të pishinës, e cila është ndërtuar së fundmi. Pas akordimit të disa muajve më parë të fondit prej 280 milionë lekësh, Vangjush Dako ka zbrazur sërish arkën e bashkisë, duke bërë një tender për preparatet e ujit.
Sipas dokumenteve që disponon Boldnews.al, Dako ka akorduar fondin limit prej 2.118.000 lekë nga të ardhurat e bashkisë, për blerjen e preparateve për mirëmbajtjen e ujit të Pishinës. Mësohet se është kërkuar të blihet ACID TRICHLOROISOCIANURIK, me ndërhyrje të shpejtë me ujin, granuluar, i bardhë, i ambalazhuar me material fibër. Do blihet STABILIZUES PH (-) GRANULUAR, i granuluar, me ambalazh plastik kundra lagështirës. Gjithashtu do të tenderohet ALKACID, trajtues kundra algave, me ambalazh plastik kundra lagështirës. Do të blihet gjithashtu TRAJTUES FLOKULACIONI që eliminon nga uji pezullime mikroskopike që ndotin ujin, me ambalazh plastik kundra lagështirës. Këto specifikime janë për një pishinë normale me rreth 2000 m3. Materialet të jenë cilësore dhe afati i skadencës të jetë jo më pak se 1 vit.
Disa javë më parë, Boldnews.al publikoi dokumentet e tenderit për pishinën publike. Sipas dokumenteve në Agjencinë e Prokurimit Publik, Bashkia e Durrësit hapi disa muaj më parë procedurën për punë, ku do të bëhej “Rikonstruksion i pishinës publike loti II-të”. “Fondi limit pa TVSH është 28.296.000 lekë. Burimi i financimit janë të ardhura të vetë bashkisë. Afati do të jetë 50 ditë, ndërsa hapja e ofertave do të bëhet në datë 12 maj 2016 në orën 10.00” thuhet në dokument. Mësohet se pishina ka përfunduar.
DT Blerje preparate per Pishinen
