Nga Boldnews.al
Ridvan Malltezi, vjehrri 73-vjeçar i pronarit të Report TV dhe Shqiptarja.com, Carlo Bollino-s rezulton të jetë aksioner në një restorant italian të quajtur “In Puglia” i pozicionuar në zonën e ish-Bllokut. Sipas fotove të disponuara nga Boldnews.al bëhet fjalë për një restorant tepër luksoz në zemër të Tiranës dhe i arreduar sipas një stili italian.
Në të dhënat e Qendrës Kombëtare të Regjistrimit, “In Puglia” është pronësi të vjehrrit të Bollinos, Ridvan Malltezit si dhe dy italianëve Francesco Milella dhe Massimo Massari. Ky i fundit është edhe kuzhinieri i restorantit, profesion ky i ushtruar prej disa vitesh në Itali dhe Gjermani. (Shkarko të dhënat e QKR)
Restoranti i Ridvan Malltezit ofron kryesisht ushqim të prodhimeve të detit por nuk mungojnë edhe pjesa tradicionale italiane si makaronat, picat apo ushqime të tjera me bazë brumi. Gjithashtu sipas të dhënave, “In Puglia” ofron shërbime katering si dhe eksport të produkteve ushqimore jashtë territorit të Shqipërisë. Boldnews.al disponon foto ku vjehrri i italianit të natyralizuar Carlo Bollino ka shërbyer me ushqim katering institucionet shtetërore duke u bërë kështu pjesë e përfitimeve të fondeve publike.
Restoranti “In Puglia” i Ridvan Malltezit është inauguruar në janar të këtij viti ku merrnin pjesë dhjetëra të ftuar. Ndërkohë në ditët e zakonshme apo në fundjavë nuk mungojnë klientë nga rrethi shoqëror i Bollinos.
Edhe pse në pension, mbeten të paqarta financimet e 73-vjeçarit Ridvan Malltezi për të nisur një biznes kaq të kushtueshëm. Ndërkohë që për të rinjtë situata e punësimit sa vjen e vështirësohet çdo ditë, për vjehrrin e Carlo Bollinos krijohet mundësia për të ushtruar një biznes dhe pse jo të marrë të ardhura edhe nga taksat e qytetarëve shqiptare.
