Asnjë organizatë terroriste nuk e ka marrë përgjegjësinë e sulmeve terroriste në aeroportin Ataturk të Stambollit ku humbën jetën të paktën 41 persona dhe 239 të tjerë u plagosën, pasi tre persona hodhën veten në erë. Megjithatë dyshimet më të mëdha të autoriteteve turke bien mbi ISIS.
Nisur nga ky fakt policia turke po punon fort për të zbuluar mbështetësit e këtij sulmi. Deri tani flitet se truri i atentatit mund të jetë Ilhami Bali, i konsideruar si kreu i degës së ISIS në Turqi.
Bali akuzohet se fshihet dhe pas disa sulmeve të tjera terroriste në Turqi, ku më i fundit është ai i janarit në Stamboll. Xhihadisti që lufton me emrin Ebu Bekir është i përfshirë në listën e terroristëve dhe njihet për lidhje të forta.
Sot mediat turke kanë publikuar bisedat e tij me një person të panjohur ku ndër të tjera Bali i kërkon atij llogari për personat që kapen në kufi nga autoritetet turke.
Këto biseda lënë të kuptohet se Bali ishte personi përgjegjës për futjen e njerëzve të ISIS brenda territorit turk. Bëhet e ditur se mijëra luftëtarë dhe familjarët e tyre kalojnë kufirin turk nga Siria.
Për shembull disa dokumente tregojnë se koordinatori me të cilin bisedon Bali ka ndihmuar 1.400 njerëz të kalojnë kufirin turk nga 22 shtatori në 17 tetor të vitit të kaluar.
Në një prej bisedave telefonike, Ilhami Bali pyeti bashkëbiseduesin e tij të panjohur për numrin e saktë të personave që ai ka ndihmuar të kalojnë kufirin.
Një tjetër bisedë mes dy subjekteve zbulon se Bali ishte shumë i pakënaqur me punën e njeriut pasi ai nuk arriti të ndihmonte disa operativë të ISIS të kalonin kufirin.
“A jeni ju që merreni me njerëzit tanë. A jeni ju personi përgjegjës për ata që u arrestuan? Mos më gënjeni mua! Tetëmbëdhjetë njerëz kaluan kufirin natën e fundit. Pesëmbëdhjetë prej tyre u arrestuan, pse nuk u përpoqët t’i ndihmoni ata”.
“Më dëgjo, të kam paralajmëruar po humbas durimin me ty. Nëse dëgjoj që nuk përpiqesh të ndihmosh djemtë tanë që të kalojnë kufirin, do të hyj në shtëpi dhe do të qëlloj në kokë. Do t’i hedh trutë në erë, kur të jesh në gjumë”.
Ndërsa në një tjetër bisedë të transkriptuar Bali e pyet koordinatorin e tyre: “Një vëlla, dy motra dhe një fëmijë u arrestuan, ndërsa ata u përpoqën për të kaluar në Kilis. Si mund të ndodhë kjo?’
