“Larg duart nga Valbona”, nën këtë moto banorët e luginës së Valbonës, përfaqësues të shoqërisë civile, ekspertë të mjedisit etj kanë protesuar sot përpara ministrisë së Energjisë dhe Industrisë dhe kryeministrisë duke kundërshtuar ndërtimin e disa HEC-ve në parkun kombëtar të Valbonës.
Protestuesit denoncuan koncesionet, pasi sipas tyre, cenohet natyra, dëmtohet ekonomia dhe zhvillimi i turizmit.
“Komuniteti është kundër këtyre hidrocentraleve sepse shkatërrojnë natyrën, cenojnë ekonominë dhe zhvillimin e turizmit. Sot kërkojmë të anulohen këto projekte, të ruajmë identitetin e Parkut Kombëtar si dhe të investojmë në zhvillimin e ekoturizmit”, thonë aktivistët.
Kjo është e disata protestë që zhvilohet kundër ndërtimit të hidrocentraleve në Lumin e Valbonës dhe sipas aktivistëve, ata do të vazhdojnë derisa të nisë bashkëpunimi me qeverinë për anulimin e kontratave koncesionare.
