Prokuroria e Përgjithshme ka regjistruar procedimin penal ndaj ministrit të Brendshëm Saimir Tahiri pas kallëzimit të bërë nga Këshilli i Lartë i Drejtësisë.
Organi i akuzës do të hetojë Tahirin për kërcënimet dhe shantazhet ndaj gjyqtarit të Tiranës Arjan Aliaj dhe trupës gjyqësore në përgjithësi.
KLD kallëzoi ministrin Tahiri pas deklaratave të këtij të fundit ndaj gjyqtarit Aliaj që pezulloi nga detyra drejtorin e Përgjithshëm të Policisë së Shtetit Haki Çako në lidhje me pajisjen ilegale të përgjimeve.
Pas vendimit të Gjykatës së Tiranës ndaj Çakos, ka qenë Kryeministri Rama dhe më së shumti ministri i Brendshëm që ka dalë disa herë në konferenca shtypi duke sulmuar dhe kërcënuar gjyqtarin që dha vendimin për Haki Çakon.
Tahiri sulmoi edhe KLD-në dhe trupën gjyqësore në tërësi, duke bërë që Këshilli i Lartë i Drejtësisë të mblidhej urgjentisht dhe të vendoste për kallëzim ndaj ministrit të Brendshëm.
Ndërkohë, kryepolici Haki Çako është rikthyer në detyrë pas vendimit të Gjykatës së Apelit që shfuqizoi vendimin e Shkallës së Parë të Tiranës.
