Shpeshherë, Shërbimi Informativ i Shtetit (SHISH) shihet nga qytetarët si një institucion i ftohtë, diskret dhe vepron larg syrit të njerëzve. Pas mureve të larta të institucioneve, apo edhe kangjellave të hekurta, pakkush e di se çfarë ndodh.
Veprimet e “spiunëve” bëhen në fshehtësi të plotë. Ata mbajnë nën vëzhgim elementë të ndryshëm penalë, bashkëpunojnë me agjenci të tjera ligjzbatuese, për sigurinë e interesave kombëtare të vendit, ruajtjen e integritetit, të pavarësisë, ë rendit kushtetues, apo për çmontimin e bandave kriminale, qofshin këto edhe në politikë.
Megjithatë, mënyra e vetme për t’iu ofruar qytetarëve të vendit shërbimet e këtij institucioni është nëpërmjet tenderëve. Pak kohë më parë, media bëri publike se SHISH kishte bërë tender për blerjen e dy lavatriçeve, 7 dhe 5 kilogramëshe, ndërsa kishte kërkuar zgara metalike, dyer dhe dritare. Në fund të vitit të kaluar, Shërbimi që drejtohet nga Visho Ajazi Lika, shiti disa kamionë, që ishin cilësuar të panevojshëm për institucionin.
Ndërkohë, së fundmi, SHISH ka bërë një tender për blerjen e luleve stinore. Sipas dokumenteve që disponon Boldneës.al, është zhvilluar procedura e prokurimit me vlerë të vogël me fond limit prej 53 600 pa tvsh, me objekt “blerje lule stinore”. Janë blerë 300 copë lule stinore kadife (e shkurtër, e çelur), 200 copë lule stinore zjarri (e shkurtër, e çelur), 150 copë lule stinore agertum (e shkurtër, e çelur), po 150 copë lule stinore midine (e shkurtër, e çelur), 8 copë bimë zbukurimi tuja dhe 4 vazo betoni (1m x 50cm x 50cm).
Sipas dokumenteve, lulet stinore duhet të jenë të pa prekura nga infeksionet dhe sëmundjet. Lulet të jenë të vendosura në vazo plastike një përdorimshe, vazot e vogla të jenë të vendosura në mbajtëse plastike15 vendëshe një përdorimshe, lulet të jenë me gjatësi 10-15 cm dhe të jenë të çelura të shkurtra.
Ndërkohë, krahas luleve, SHISH ka ofruar 140 275 mijë lekë të reja si fond për blerje kasafortash. Janë blerë 10 të tilla, me strukturë llamarine me trashësi jo më pak se 1.5 mm, të ketë dy ndarje horizontale nga brenda, ku të krijohen tre hapësira, dera të jetë e pajisur me dorezë dhe bravë sekrete, lyerja me mënyrë elektrostatike, bazamenti të jetë jo më pak se 10 cm dhe kasaforta të ketë paraqitje estetike dhe saldimet të mos shikohen në pjesën e jashtme.
