Deklaratat e forta të Ministrit të Brendshëm Saimir Tahiri në drejtim të gjyqtarit Arjan Aliaj, e ka detyruar Këshillin e Lartë të Drejtësisë të marrë masa të ashpëra. Në mbledhjen e zhvilluar jashtë radhe të thirrur nga presidenti Bujar Nishani u vendos që Ministri Tahiri të kallëzohej penaliosht pranë Prokurorisë së Përgjithshme.
“Në mbledhje është diskutuar lidhur me situatën e krijuar në sistemin gjyqësor, pas sulmeve të papranueshme, fyese dhe kërcënuese të ministrit Saimir Tahiri, ndaj gjyqtarit Arjan Aliaj. Gjatë diskutimeve, anëtarët e Këshillit, dënuan ashpër intimidimin që po i bëhet gjyqtarit z. Arjan Aliaj në veçanti por dhe trupës gjyqësore në tërësi, ku në përfundim, Këshilli vendosi të bëjë kallëzim penal pranë Prokurorit të Përgjithshëm, ndaj ministrit të Punëve të Brendshme z. Saimir Tahiri.” – thuhet në njoftim që ndodhet në faqen zyrtare.
Por ky veprim i KLD-së mesa duket nuk është edhe aq i rastësishëm. Kryeprokurori Adriatik Llalla bashkë me dy prokurorë të tjerë u panë një ditë më parë në dyert e presidencës. Ata u takuan me presidentin Nishani ku sipas burimeve i kanë raportuar për hetimet për pajisjen e përgjimit.
Por me këtë vendim të sotëm të KLD, dyshimet shtohen se kryeprokurori Llalla dhe presidenti Nishani kanë diskutuar edhe mundësinë e ndjekjes penale të Ministrit të Brendshëm Saimir Tahiri.
Pritet në ditët në vijim për tu parë nëse Prokuroria e Përgjithshme do të pranojë kallëzimin penal ndaj ministrit Tahiri.
Boldnews.al
