Federata greke e futbollit ka deklaruar se po përgatit padinë për të dënuar Shqipërinë në kampionatin evropian, për shkak të një parullë që u shfaq në stadiumin e Lens në Francë.
Atje shkruhej: “Greqia është fajtore. Kujto genocidin në Çamëri. 100 mijë shqiptarë të vrarë” u shfaq në stadiumin e Lens-it në Francë, gjatë ndeshjes Shqipëri-Zvicër. Athina ka kërkuar prej autoriteteve franceze dhe UEFA-s që të hetojnë lidhur me mënyrën sesi u bë i mundur futja e kësaj banderole brenda stadiumit, megjithë masat e rrepta që janë marrë për sigurinë e Euro 2016, si dhe të marrin masa që ngjarje të tilla mos të përsëriten më.
Por në të vërtetë parulla është shfaqur në krahun e tifozëve zviceranë dhe kjo mund të hedhë poshtë pretendimet e federatës greke për parullën për Çamërinë në evropian.
Megjithatë në një njoftim për shtyp të Ministrisë së Jashtme greke, thuhet se kjo ministri dënon në mënyrën më të ashpër përdorimin e banderolave dhe simboleve provokuese, përmbajtja e të cilave provokon reagime për nga pëmbajtja dhe simbolika e tyre.
“Janë pikërisht këto organizma, që kanë përgjegjësinë për të penguar futjen në stadiume të banderolave dhe simboleve ekstremiste që provokojnë reagime nga vendet pjesëmarrëse”, shkruhet në komunikatë.
Në kërkesën e saj, Athina shpreson në dënimin shembullor të autorëve, si dhe kërkon prej autoriteteve shqiptare, të distancohen nga përmbajtja e saj dhe ta dënojnë këtë gjest, që sipas Athinës, dëmton imazhin e marrëdhënieve dypalëshe.
Sipas Athinës, këto veprime provokatore bëhen prej qarqeve që kundërshtojnë qasjen e re midis Greqisë dhe Shqipërisë pas vizitës pak ditë më parë të ministrit të Jashtëm grek, Nikos Kozias në Tiranë.
