Pas dështimit të takimit Rama –Basha, kreu i Kuvendit Ilir Meta i është drejtuar sot me një kërkesë zyrtare kreut të PD¬së, Lulzim Basha. Mësohet se takimi mes tyre mund të jetë ditën e hënë.
Kjo ftesë vjen pasi kreu I kuvendit Meta e ka quajtur keqkuptim dhe të sqaruar çështjen e futjes së draftit të reformës në kalendarin tre javor të punimeve. Në një deklaratë për mediat, Meta njoftoi për ftesën me të cilën i është drejtuar Bashës.
Ja fjala e Metës:
Si kryetar i Kuvendit më duhet të mos paragjykoj asnjë aktor dhe faktor përfshi edhe opozitën. Kjo është arsyeja që kam kërkuar këtë takim me zotin Basha si kryetar i opozitës dhe nuk më lejohet të paraqes asnjë paragjykim dhe të nxitohem pa u zhvilluar ky takim. Opozita është shprehur se është për reformën në drejtësi, opozita ka qenë e përfshirë, opozita i është drejtuar 2 herë Komisionit të Venecias dhe ka marrë përgjigje për pyetjet për standardet e reformës, opozita ka qenë në komisionin e posaçëm, ka qenë në bashkëpunim dhe diskutim të vazhdueshëm me Euralius dhe Opdate dhe unë s’kam asnjë arsye të paragjykoj mendimin e tyre. Por meqenëse jemi në krizë me kohën për shkak të axhendës europiane të Shqipërisë, jam i angazhuar për të përfshirë plotësisht opozitën në një proces transparent, me integritet dhe me cilësinë e duhur dhe të kërkuar.
Takimi kokë më kokë?
Takimi mes meje dhe zotit Basha është kërkuar nga ana ime si një takim zyrtar, që nuk është informal dhe e nënvizoj jam shumë fleksibël për gjithçka që ka të bëjë me vendin e takimit, me formatin e takimit dhe me çdo element tjetër por nuk jam shumë fleksibël tek koha. Jam fleksibël për tu takuar që tani, në mes të natës, pa u gdhirë mirë, por mundësisht deri të hënën pasi ndryshe mund të kompromentojmë procedurat parlamentare.
Shpresoj të jetë një takim i dobishëm. Siç jam i hapur edhe për çdo takim me aktorë të tjerë. Për të verifikuar qëndrimin e secilit dhe për të dhënë një zgjidhje me legjitimitet dhe integritet.
Qëllimi i ftesës është shumë i qartë. Vullneti është maksimal. Takimi i zhvllaur mes zotit Rama dhe zotit Basha, hap pozitiv, ka qenë takim shumë i vonuar pasi mund të ndodhte prej kohësh. Të paktën brenda prillit, por mendoj se është ishte një hap pozitiv. Por jam i bindur se nëse ekziston vullneti i plotë dhe nuk kam arsye ta dyshoj, gjithçka mund të zgjidhet shumë shpejt duke garantuar cilësinë e reformës sipas Euralius dhe Opdate dhe t’u japim edhe një lajm të mirë gjithë qytetarëve dhe mbështetësve të Shqipërisë në Bruksel.
A do keni një përfaqësues të PS në takim?
Jam i hapur për çdo zgjidhje dhe format që ofron zoti Basha.
Si kryetar i Kuvendit a mendoni se një skenar me vota të peshkuara dhe të munguara nga opozita a mendoni se i jep reformës integritetin që ka nevojë?
Unë kam vullnetin maksimal dhe do jem i palodhur për të garantuar mbarëvajtjen e reformës në drejtësi. Për këtë duhet bashkëpunim dhe përgjegjësi nga të gjithë dhe shpresoj gjithashtu edhe nga opozita.
Çfarë do t’i ofronit zotit Basha më shumë se zotit Rama?
Kuptoj se e paskeni të nevojshëm edhe një bisedë me zotin Vasili që ishte në atë takim. Unë do jem si kryetar i Kuvendit. Transparencë maksimale, vullnet maksimal për cilësinë e duhur të reformës dhe për integritetin parlamentar të gjithë këtij procesi dhe suksese për nesër.
