Gjashtë nëpunës të Bashkive Përmet, Skrapar dhe Lezhë dhe 3 mbikqyrës punimesh janë dërguar për ndjekje penale nga Kontrolli i Lartë i Shtetit, nën akuzën se kanë shkaktuar një dëm prej rreth 500 mijë dollarësh.
Sipas KLSH, zyrtarët kanë kryer shkelje në procedurat e prokurimit publik dhe zbatimit të kontratave publike.
Konkretisht, tre anëtarët e Komisionit të Vlerësimit të Ofertave në Bashkinë Përmet në procedurat e prokurimit me objekt: “Rikonstruksioni i trotuareve në bllokun e qendrës qyteti, Përmet” ka bërë skualifikim të padrejtë të një operatori ekonomik pjesëmarrës në tender.
Ndërsa 3 anëtarët e Komisionit të Vlerësimit të Ofertave (KVO) dhe 2 Mbikëqyrës të zbatimit të kontratave, në Bashkinë Skrapar kanë shkelur parimin e përzgjedhjes së ofertës fituese duke diskriminuar e trajtuar në mënyrë të pabarabartë ofertuesit në tenderin për “Ndërtimin e unazës Jug-lindore të qytetit Çorovodë”.
Në prokurori ka përfunduar dhe përfaqësuesi i shoqërisë mbikëqyrëse të zbatimit të kontratave në Bashkinë Lezhë, i cili ka raportuar për punime të cilat kanë rezultuar të pa kryera dhe për pajisje të pavendosura por të raportuara e të pasqyruara në librezën e masave.
