Deputeti i Partisë Socialiste Ben Blushi ka sulmuar ashpër Qeverinë dhe Kryeministrin Edi Rama, duke e quajtur këtë të fundit të paaftë për të qeverisur.
Duke folur në Parlament, deputeti Blushi tha se Rama është i paaftë dhe gjatë këtyre viteve të qeverisjes nuk ka bërë asgjë tjetër, përveç se “ka lyer me bojë gërmadhën e Sali Berishës”.
“Doli Kryeministri para një jave, se këtu ka çudira. Ishin disa protestues. Edhe shkuan të protestojnë për një stadium me majuckë. Ju tha nëse doni të merrni vendim shkoni merrni votat. Nuk ka gjë më cinike dhe më fyckë se kaq. Edi Rama është i paaftë për ta na qeverisur. Po e administron vendin shumë keq prej tre vitesh. E vetmja gjë që Edi Rama po bën në 3 vjet po lyen me bojë gërmadhën e Sali Berishës. Kjo është puna e Edi Ramës në 3 vjet”, u shpreh Blushi.
Deputet socialist foli edhe për aksidentin tragjik që ndodhi në fundjavë në Kavajë, ku humbën jetën dy fëmijë dhe për këtë akuzoi instancat përkatëse për heqjen e barrierave mbrojtëse. Blushi përmendi shkurt edhe Klemend Balilin, që akuzohet edhe nga shtypi grek si “Baroni i Ballkanit”.
“A mbron ky Parlament interesin publik të shqiptarëve sa i takon pronës, jetës, arsimit, shëndetësisë? Para 1 jave, një grua me 3 fëmijë po shkonte për të parë burrin e vet në burg. Aksidenti nuk ishte nga pakujdesia, por nga sabotimi i interesit publik. Vdiqën dy fëmijë. Një familje u shkatërrua sepse një burrë po ndërtonte një çati. As Kryeministri nuk foli.
Kush e hoqi interesin publik? Interesi privat shkaktoi dy viktima një 5 vjec dhe një 3 vjec. Po pse ishin hequr ato 10 metra ndarëse? S’kishte para? Jo, ishin hequr për t’i shërbyer një karburanti privat. Kë mbrojti këtë rast qeveria? Karburanti privat. Shiko me cfarë llogjesh merren sot”, tha deputeti i PS Ben Blushi.
