Alban Trimi, polici që prishi provat gjatë ekzekutimit të Elton Çiços ka dalë sot para Gjykatës së Tiranës ku kjo e fundit ka vendosur masën e sigurisë “arrest me burg” për të.
Prokuroria ka përdorur pamjet e kamerave të sigurisë si provë kryesore të hetimit, në të cilat duket se Trimi ka lëvizur trupin e viktimës dhe ka marrë çantën e tij, në të cilën ishte një armë, me synimin për ta fshehur. Gjatë seancës, Trimi ka mbajtur qëndrim mohues për akuzat e prokurorisë, por nga pamjet filmike rezulton e kundërta. Grupi i hetimit ka kërkuar në gjykatë caktimin e masës arrest me burg për oficerin e Antidrogës, me akuzën se ka penguar hetimet.
Zhdukja e armës
Burime të Prokurorisë së Tiranës, e cila po heton ngjarjen, thanë se është provuar fakti se viktima Elton Çiça ka pasur me vete në vendngjarje një armë zjarri pistoletë.
Po kështu, nga pyetja e dëshmitarëve dhe këqyrja e përsëritur e kamerave të sigurisë, ka dyshime serioze se polici Alban Trimi dhe mjeku Redjan Rraja kanë bashkëpunuar mes tyre në marrjen e pistoletës dhe më pas zhdukjen apo fshehjen e saj. Siç dyshon Prokuroria, i pari që ka prekur armën e viktimës ka qenë Redjan Rraja. Ai dyshohet se ka kryer veprime për të fshehur pistoletën dhe celularin e Elton Çiçës, pasi ai kishte rënë në tokë nga plumbat. “Redjan Rraja dyshohet se ka vepruar i pari, pasi është filmuar teksa merrte pistoletën nga çanta e Çiçës dhe bashkë me Alban Trimin, dalin jashtë nga lokali në ndjekje të autorit. Në kamera duket edhe momenti kur Rraja mbush pistoletën, por pasi konstatuan se vrasësi ishte larguar nga lokali, ata janë kthyer brenda në lokal”, thanë burimet e hetimit. Sipas tyre, personi i fundit që ka mbajtur armën ka qenë oficeri i Policisë Alban Trimi. Nga ana tjetër, Prokuroria thotë se në procesverbalin e vendngjarjes nuk është shënuar që pistoleta të jetë gjetur në vendin e krimit.
