“Në gjithë vitet që pararendën ardhjen tonë në qeveri, është sponsorizuar “dembelizmi masiv”, kjo është një pjesë e asaj çka tha sot kryeministri Edi Rama në Panairin e Punës.
Edhe për dembelizmin e shqiptarëve Rama e ka komentuar duke fajësuar qeverinë e kaluar. Sipas tij, ajo çka ka sjellë dembelizmin është mungesa e një infrastrukture duke sjellë rënie katastrofike të cilësisë dhe krahut të punës.
“Në gjithë vitet që pararendën ardhjen tonë në qeveri, është sponsorizuar “dembelizmi masiv”. Është incentivuar “dembelizmi masiv” dhe mungesa e një strukture dhe infrastrukture. Mungesa e një mësimi profesional ka sjellë një rënie katastrofike të cilësisë dhe krahut të punës dhe një shkëputje shumë të madhe mes kërkesës dhe ofertës, mes aasaj çka biznesi ka nevojë, dhe asaj çka tregu i punëkërkuesve ofron”
Por në perceptimin e kryeministrisë, shqiptarët nuk janë vetëm dembela. Shumica e atyre që kërkojnë punë janë edhe të pashkolluar, tha Rama. “55% e punëkërkuesve thonë se nuk kanë profesion dhe janë me shkollë 9 vjeçare” u shpreh kryeministri, që vuri në dukje se Panairi i Punës i hapur në Tiranë, ofron 8 mijë vende të reja punë. Para Ramës, kishte folur Blendi Klosi, i cili në fjalim përsëriti disa herë slloganin “Shqipëria ka punë, por duhen profesionistë”.
