Nazime Visha u kërcënua me jetë ditën e djeshme nga djali dhe gruaja e Fiqiri Muçës.
Ajo kallëzoi në polici telefonatën kërcënuese duke kërkuar një urdhër mbrojtje. Sot, u zhvillua seanca gjyqësore nga ku u mësua se Nazimja nuk do pajiset me urdhrin e kërkuar. Ajo u fotografua teksa hyri në seancën gjyqësore dhe doli nga dera e pasme, andej nga kalojnë të arrestuarit, mesa duket për të shmangur kontaktin me mediat.
Nazime Visha u lirua vetëm pak kohë më parë nga burgu pas amnistisë së Presidentit duke i falur asaj 6 vitet e ngelura në burg.
Nuk ka ende ndonje sqarim për pse-në e mospajisjes me urdhër mbrojtje, por jozyrtarisht flitet për një tërheqje të vetë Nazime. E dënuar për vrasjen e Fiqiri Muçës, me të cilin kishte një lidhje intime, por që sipas saj ai e kishte detyruar dhe përdhunuar që në moshë të re, Visha është përballur me kërcënime me jetë porsa ka dalë nga burgu. Ajo pretendon se familjarët e Fiqiri Muçës e kanë kërcënuar me jetë. Ajo madje ka thënë se ka marrë telefonata nga njerëz të panjohur, për të cilët thotë se e kanë kërcënuar me vrasje. Por nga ana tjetër, bashkëshortja e Fiqiri Muçës deklaroi dje se familja e saj me zor siguron bukën e gojës dhe se nuk ka nge që të merret me Nazime Vishën.
