“Hakmarrja për Drejtësi” i përgjigjet me një letër të hapur akuzave të ish kryeministrit Sali Berisha lidhur pretendimet se Kulla që pritet të ndërtohet tek Stadiumi i ri do t’i jepet kësaj organizate.
Në letrën e dërguar nga Laert Shyti dhe Orik Shyti dhe që e disponon Boldnews.al, thuhet se Berisha i ka dhënë “Hakmarrjes për Drejtësi” një lajm pozitiv që vetë ata nuk e dinin.
“Nuk i kemi të rralla sihariqet, por ky i sotmi është më “shtatlartë” se të tjerët, është kullë. Kemi 20 vjet që krimet dhe ndërtimet “tona” i marrim vesh nga Sali Berisha. Dhe kjo është normale. Se nga kush tjetër, përveçse nga ideatori dhe pronari i “Hakmarrjes për Drejtësi” do t’i merrnim vesh? Ai e ndihen për detyrë që, sa herë ndodhin krime të rënda dhe ka ndërtime të mëdha, “Hakmarrja” e tij të ketë pjesën e saj.”– thuhet në letër.
Organizata shprehet më tej se ish kryeministri Berisha prej vitesh i akuzon për pasuri marramendëse në Shqipëri.
“Është zakon i lashtë ndër shqiptarë që lajmësit diçka i jepet. Dhe ne kemi bërë sa kemi mundur, i kemi ofruar herë shumëçka e herë diçka me mirënjohjen që i takon. Po kujtojmë se për sihariqet e panumërt që kishte dhënë botërisht për ndërtime pallatesh e vilash, në shtator 2005, sapo bëri betimin si kryeministër, ia ofruam të gjitha pallatet, vilat dhe pasuritë e patundshme. Botërisht iu lutëm që vlerën e gjithë asaj pasurie ta kalonte për të ndihmuar fëmijët e shumtë të mbetur jetimë nga vëllavrasjet në Tropojë, në saje të kujdesit të tij për krahinën ku kishte lindur.”- thekson “Hakmarrja për Drejtësi”
Duke përdorur ironi, vëllezërit Shyti shprehen se të gjithë pasurinë e tyre ia bëjnë dhuratë Berishës dhe zëdhënësve të tij.
“Edhe sot i takon diçka dhe ne po i ofrojmë nga kulla një apartament për çdonjërin nga zëdhënësit që prej vitesh i nxjerr në konferenca shtypi për të na dhënë sihariqin e ri. Meqë djemtë, vajzat, gratë dhe burrat që ka përdorur si zëdhënës të tij për “Hakmarrjen për Drejtësi” janë të shumtë dhe është normale ta kalojnë numrin e apartamenteve të kullës së projektuar, po i sigurojmë të mos merakosen, as të grinden mes tyre se, duan apo s’duan qeveritarët vendorë e qendrorë, me ndihmën e Saliut do t’ia shtojmë edhe një apo dy kate kullës. Rasti na kujton fjalët për qoftëlargun, “Djalli s’ka dele, por s’resht së shituri lesh”.” – përfundon letra e Orik Shytit dhe Laert Shytit.
