Të zgjedhurit e rinj në Kryesinë e Partisë Socialiste njihen si mbështetësit kryesor të kryetarit Edi Rama. Votimi përforcoi edhe më tej idenë e tij për të “privatizuar” Partinë Socialiste.
Po kush ishin të zgjedhurit e rinj të Kryesisë së PS?
Pandeli Majko dhe Blendi Klosi kanë ndarë bashkë të njëjtin numër votash nga anëtarët e Asamblesë së PS. Me 242 vota secili janë emrat më të votuar nga Asambleja e PS. Pas tyre me një diferencë të papërfillshme prej dy votash renditet Erjon Veliaj dhe Saimir Tahiri.
Kryetari i Bashkisë së Tiranës dhe Ministri i Brendshëm, janë në të njëjtin ritëm në garën për të fituar mbështetje brenda partisë.
Eglantina Gjermeni është femra më e votuar në Asamble. Ajo ka kaluar në renditjen e kryesisë kolegen tjetër në qeveri, Mimi Kodheli me një diferencë prej 7 votash. Të dyja kanë lënë pas disa ministra apo figura të tjera, të njohura në PS. Vlen për t’u përmendur se Arta Dade ia bëri më të lehtë garën të gjitha grave dhe vajzave me tërheqjen e saj.
Një rënie drastike në numrin e votave ka pësuar Valentina Leskaj, e cila 4 vite më parë ishte një nga më të votuarat nga Asambleja e Partisë Socialiste, ndërsa sot renditet e fundit për nga numri i votave.
I palëvizur nga postet e tij si në Durrës ashtu edhe në parti, Vangjush Dako që betonon një mandate të dytë në kryesi, ndryshe nga të gjithë kryetarët e tjerë të Bashkive. I kënaqur duhet të ketë dalë sot nga Xibraku, Taulant Balla, që për herë të parë në jetën e tij është pjesë e Kryesisë së PS. Balla ka qenë i gatshëm të luftojë çdokënd që i kundërvihet Edi Ramës, brenda apo jashtë partisë.
Të larguarit nga kryesia e kaluar janë shumë. Që nga Arben Malaj, tashmë i përjashtuar nga çdo funksion në PS. Nuk është më Ben Blushi, të cilin Edi Rama nuk e propozoi si anëtar kryesie.
Një refuzim të dytë ka marrë Edi Rama sot edhe nga Namik Dokle, i cili është arsyetuar me moshën që ka, përballë kryetarit. I padëshiruar jo vetëm në qeveri, por edhe në parti duket të jetë Shkëlqim Cani që 4 vjet më parë ishte një emër fitues në Kryesi. Nuk është më pjesë e strukturave të larta drejtuese as Arben Isaraj.
Gramoz Ruçi është shpërblyer me të njëjtën bujari nga kryetari, që nuk i ka vënë asnjë kandidaturë alternative si Sekretar i Përgjithshëm. Njësoj si kryetari, edhe Gramz Ruci shijoi një votim me mbi 90% mbështetje. Nga 286 anëtarë Asambleje, 266 votuan pro tij, 2 ishin kundër.
Ben Blushi dhe Mimoza Hafizi u lanë jashtë të gjitha strukturave dhe ky vendim i Edi Ramës duket si një “Udha e mbarë” nga kryetari që e ka blinduar përfundimisht PS.
Gramoz Ruçi, Sekretar i Përgjithshëm me 266 vota pro, 2 kundër dhe 3 të pavlefshme
KRYESIA E PS
Pandeli Majko, 242 VOTA
Blendi Klosi, 242
Erjon Veliaj, 236
Saimir Tahiri, 234
Eglantina Gjermeni, 226 vota
Ditmir Bushati, 219
Mimi Kodheli, 219 vota
Arben Ahmetaj, 216
Niko Peleshi, 214
Fatmir Xhafaj, 214
Damian Gjiknuri, 210
Taulant Balla, 208
Erjon Braçe, 208
Vasilika Hysi, 197 vota
Vangjush Dako, 181
Armando Subashi, 177
Lindita Nikolla, 177 vota
Evis Kushi, 167 vota
Olta Xhacka, 166 vota
Valentina Leskaj, 163 vota
