Një nga tenderët më të debatueshëm të kohëve të fundit është ai i mobilimit të ministrisë së Brendshme. Rikonstruksioni i kësaj godine, në Bulevardin “Dëshmorët e Kombit”, solli zhvendosjen e ministrisë përkohësisht në ambientet e Gardës së Republikës. Godina po i nënshtrohet një rregullimi të plotë, ndërsa qeveria ka akorduar rreth 1 milionë USD për mobilimin.
Boldnews.al ka siguruar dokumentet e tenderit për “blerjen e orendive dhe pajisjesh për mobilim zyrash”.(Shkarko dokumentin)
Fondi limit është 128 113 807 lekë (të reja) pa TVSH. Mësohet se financimi do të bëhet nga buxheti i shtetit, ndërsa bërja e tenderit do të bëhet më 19 prill 2016.
Mësohet se do të blihet banak për recepsion, dollapë të ndryshëm, karrige klase, mense, për salla konferencash, rrotulluese, apo karrige tip kolltuku. Do të blihen karrige të thjeshta, si në kinema etj. Do të blihen kasaforta, krevat tek, apo edhe poltrone të ndryshme.
Do të blihen edhe tavolina pune në rang drejtuesi, me përmasa të mëdha në formë L-je. Sipas dokumenteve, do të merren edhe 36 frigoriferë, 118 varëse rrobash. Do të blihen edhe 29 televizorë plazma 50 inç, dhe 8 televizorë të tjerë plazma të përmasave të ndryshme. Do të merren dhe rreth 20 kolltukë si dhe do të blihen të gjitha perdet e godinës së Ministrisë së Brendshme.
Në dokumentet që zotëron Boldnews.al është e detajuar edhe sesi do të jetë zyra e ministrit të Brendshëm. Zyra do të jetë me një hapësirë të bollshme dhe do të vendoset në katin e parë, ndërsa mobiliet duhet të jenë bashkëkohore, në ngjyrë qumështi. Karrigia do të jetë e lëvizshme, me rrota e me ngjyrë të zezë. Në zyrë do të jetë edhe një tavolinë e madhe mbledhjesh për 14 persona. Karriget, por edhe tavolina, do të jenë sërish me ngjyrë qumështi. Mësohet se, edhe kolltukët do të kenë të njëjtën ngjyrë, ndërsa zyra do të ketë edhe një bibliotekë të madhe.
Më poshte gjeni planimetrin e arredimit të gjithë godinës së Ministrisë së Brendshme të siguruar nga Boldnews.al
