Dy pronarët e “Vollgës” në Durrës janë treguar shumë bujarë me Emiljano Shullazin, duke ia dhuruar “në shenjë mirënjohje” të gjithë sipërfaqen prej rreth 1700 m2 të ish-hotelit simbol, në qendër të qytetit të Durrësit.
Pas ndalimit të tij me urdhër të Prokurorisë për Krime të Rënda, i dyshuar për “pjesëmarrje në organizatë kriminale”, kanë nisur të dalin në dritë dokumenta që dëshmojnë për veprime tërësisht të dyshimta, në bazë të të cilave Shullazi është bërë pronar i një aseti shumë të rëndësishëm në qytetin bregdetar.
Në nëntor 2014, kompania Saudi Brothers, pronare e vetme e kompleksit “Vollga” i shet një pjesë së pasurisë së paluajtshme për shumën 671 mijë euro shtetasve Fejzi dhe Marjeta Kodra. Në këtë mënyrë, kompeksi “Vollga”, kishte dy pronar; ‘Saudi Brother” dhe familjarët Kodra. Familjarët Kodra, nga ana e tyre, duket se nuk kanë mundësi të tilla financiare për shpenzimin e shumës së blerjes.
Gjithësesi, rreth një muaj më pas, dy bashkëpronarët, pra “Saudi Brother.” dhe familja Kodra vendosin t’ia dhurojnë pasurinë e tyre Emiljano Shullazit, me argumentin “në shenjë mirënjohje”.
Në kontratën e dhurimit nuk ka asnjë shpjegim se përse pronarët e ligjshëm i ishin mirënjohës Shullazit. Për më tepër, ky i fundit nuk ka asnjë aktivitet të regjistruar dhe nuk figuron i punësuar në asnjë regjistër publik.
Dyshimet e Prokurorisë për Krime të Rënda konsistojnë në faktin se ai ka përfituar pasuri të konsiderueshme, duke i vendosur “gjoba” biznesmenëve të ndryshëm. Edhe rasti i përfitimit “me dhurim” të ish-hotel “Vollga” në Durrës është pjesë e hetimit të nisur rreth 3 muaj më parë nga ana e Prokurorisë.
Kontrata e dhurimit ka shumë pikëpyetje brenda saj. Është ende e paqartë për momentin se çfarë i lidh ish-pronarët e mëparshëm të “Vollga” me Shullazin. Gjithashtu, është e nevojshme të sqarohet se përse familjarët Kodra, një pjesë së pasurisë së tyre që e blerë 670 mijë euro, vendosën ta dhurojnë vetëm një muaj pasi kishin shpenzuar shumën e konsiderueshme.
