Deputeti socialist, Erjon Braçe, njëherësh edhe kryetar i Komisionit të Ekonomisë ka provokuar një krizë mes koalicionit PS – LSI me deklaratat e tij.
Duke folur për Ora News, Braçe u shpreh kritik ndaj letrave të kreut të grupit parlamentar të LSI për çështjet e bujqësisë.
Braçe: Po nëse është problem zgjidhet brenda qeverisë, çështë kjo histori që Vasili i shkruan Kryeministrit për një punë që duhet ta bëjë Ministri i Bujqësisë, çfarë logjike është kjo?
Sipas Braçes problem i vërtetë i bujqësisë nuk lidhet me eksportet në Maqedoni por me vetë Ministrin që nuk i qëndron në krye të punës.
Braçe: Situata që ne kemi sot në ekonomitë bujqësore të Myzeqesë nuk lidhen me Maqedoninë, lidhet me probleme të tjera, ato janë probleme reale shumë të thella që duan ballafaqim dhe përmirësim.Duan në krye të punëve Ministrin e Bujqësisë dhe Drejtoritë e Bujqësisë.Ajo që na ka ndodhur me infektimin e ekonomive bujqësore, serave, ka të bëjë me moskëshillimin e bujqëve. Nuk e kanë bërë punën, më kritik se unë ka qenë zoti. Meta në 3-4 takime atje, ka thënë shumë më tepër se unë edhe përkundër Ministrit të Bujqësisë, edhe përkundër Drejtorit të Bujqësisë së Lushnjes.
Braçe u shpreh edhe kundër propozimit të LSI për koncesionet duke thënë se propozimi i tyre nuk rrit transparencën. Ai tha se duhet ndërtuar një proçes Qeveri-Parlament që në fazën e pare të koncesioneve dhe të mos sillen në Kuvend vetëm për të ngritur kartonat.
